Stjórnvöld á Grænhöfðaeyjum hafa tekið yfir hlut íslenskra hlutahafa, þar á meðal dótturfélags Icelandair Group, í flugfélaginu Cabo Verde Airlines.
Þjóðnýtingin kemur í kjölfar lagasetningar sem samþykkt var á þingi Grænhöfðaeyja í síðustu vikur. Forsætisráðherra landsins hafði áður viðrað hugmyndir um að taka flugfélagið yfir ef núverandi hluthafar myndu ekki leggja fé í upprisu félagsins. Starfsemi þess hefur legið niðri síðan heimsfaraldurinn hófst í mars í fyrra og fjárþörfin er því töluverð.
Það hefur hins vegar legið fyrir að Icelandair Group, sem á 36 prósent í flugfélaginu í gegnum dótturfélag Loftleiða, ætlaði ekki að setja aukið fjármagn í reksturinn. En eignarhluturinn í Cabo Verde Airlines hefur verið afskrifaður í bókum íslensku samsteypunnar.
Þessi 36 prósent hlutur var keyptur í ársbyrjun 2019 og samhliða þeim viðskiptum þá keypti hópur íslenskra fjárfesta, þar á meðal Björgólfur Jóhannsson fyrrum forstjóri Icelandair samsteypunnar, fimmtán prósent í flugfélaginu. Björgólfur varð í kjölfarið stjórnarformaður Cabo Verde Airlines.
Líkt og fram kom hér á síðum Túrista í byrjun mánaðar þá höfðu ráðamenn á Grænhöfðaeyjum einnig rætt um að kaupa hlut Íslendinganna í Cabo Verde Airlines en af því varð ekki.
Túristi mun birta viðbrögð við þessari stöðu sem komin er upp þegar svör berast frá íslensku hluthöfunum og stjórnvöldum á Grænhöfðaeyjum.