Marriott hótelkeðjan hefur opnað fimm Edition hótel í Evrópu og þar af eitt við Hörpu í Reykjavík. Það er jafnframt fyrsta fimm stjörnu hótelið í höfuðborginni.
Og þeir sem bóka í dag gistingu á hótelinu frá fimmtudegi til sunnudags í maí borga að lágmarki 64 til 71 þúsund krónur á nótt fyrir tveggja manna herbergi með morgunmat samkvæmt athugun Túrista. Í júní hækkar verðið og er að lágmarki 92 þúsund krónur en þá er morgunmaturinn ekki lengur innifalinn.
Prísinn fer reyndar upp um fimmtung ef gestirnir gista aðeins í tvær nætur en lækkar um tíu þúsund krónur á nótt ef dvölin er lengd upp í 6 nætur.
Verðlagið á Edition hótelinu í Reykjavík er nokkuð hærra en á gististöðum hótelkeðjunnar á Spáni eins og sjá má hér fyrir neðan. Aftur á móti er gistingin hjá Edition í London og Bodrum í Tyrklandi mun dýrari. Þau tvö hótel hafa líka verið opin í lengri tíma en hin og bókunarstaðan því væntanlega mun betri.
Sem fyrr segir er hótelið við Hörpu eina fimm stjörnu hótelið í Reykjavík og þeir sem ætla að gista þar í sumar borga nokkru meira en gestir hótelanna sem áður voru þau fínustu í miðborginni. Samkvæmt lauslegri könnun Túrista kosta tveggja manna herbergi á þeim hótelum á bilinu 45 til 65 þúsund krónur í sumar.