Fyrir fjórum árum var Icelandair að öllu leyti í eigu Íslendinga og sjö af tíu stærstu hluthöfunum voru íslenskir lífeyrissjóðir. Í dag eiga bandarískir fjárfestingasjóðir um 27 prósent hlut í Icelandair og af þeim fimm sem sitja í stjórn flugfélagsins búa fjögur í Bandaríkjunum.
Það hafa því orðið töluverðar breytingar á eignarhaldi og yfirstjórn flugfélagsins síðastliðin ár. Í ræðu sinni á aðalfundi Icelandair í gær vakti Bogi Nils Bogason, forstjóri, sérstaklega máls á því að ekki mætti ganga að því vísu að höfuðstöðvar félagsins væru á Íslandi.
„Kjarninn í viðskiptalíkani Icelandair er leiðakerfið sem við höfum byggt upp á undanförnum áratugum. Í því höfum við nýtt einstaka staðsetningu Íslands í miðju Atlantshafinu til að byggja upp öfluga tengimiðstöð milli Evrópu og Norður Ameríku. Í því samhengi hefur Ísland, bæði land og þjóð, mikla þýðingu fyrir okkur. Við erum íslenskt félag og með þá stefnu að halda merkjum Íslands á lofti um allan heim og á sama tíma hafa góð áhrif á íslenskt samfélag og efnahag,“ sagði Bogi Nils.
„Að reka íslenskt flugfélag með höfuðstöðvar á Íslandi er þó ekki sjálfgefið,“ bætti hann við.
Með þessum orðum er forstjórinn þó ekki að boða flutning Icelandair úr landi. Þegar Bogi Nils var spurður hvort það hafi verið rætt í stjórn flugfélagsins að flytja höfuðstöðvarnar til útlanda sagði hann í svari til Túrista að það hafi aldrei komið til tals að flytja höfuðstöðvarnar.
„Ég á alls ekki von á því að það muni koma upp á stjórnarfundi. Það sem ég var að vísa í er að það er dýrt að reka flugfélag á Íslandi. Við verðum alltaf lítil miðað við stóru flugfélögin, Ísland er dýrt land. Við verðum að fókusera á kostnaðinn eins og við getum en sterkt tekjumódel er grundvöllurinn að rekstri flugfélags á Íslandi og þar hefur Icelandair náð góðum árangri og byggt upp mjög sterka innviði til margra ára. Það skiptir líka miklu máli að vera með réttu vöruna miðað við kostnaðinn og umhverfið sem við erum að vinna í,“ segir Bogi Nils Bogason, forstjóri Icelandair.