Þeir fjárfestar sem tóku þátt í hlutafjáraukningu Play hafa nú fengið hluti sína afhenta og þar með ríflega tvöfaldaðist fjöldi útgefinna hluta í flugfélaginu við opnun Kauphallarinnar í morgun. Um leið fór markaðsvirði félagsins úr 3,9 milljörðum í 8,5 milljarða.
Í hlutafjárútboðinu var hver hlutur seldur á 4,5 krónur og markaðsgengi gömlu bréfanna var það sama þegar Kauphöllinni lokaði í síðustu viku. Í fyrstu viðskiptunum í dag lækkaði gengi um 2,2 prósent vegna viðskipta upp á 519 þúsund kr. Um leið fór markaðsvirðið niður um 200 milljónir og er því núna 8,3 milljarðar króna.
Velta með bréf í Play hefur verið mjög lítil síðustu vikur en tilkynnt var um ný yfirstaðið hlutafjárútboð í byrjun febrúar. Gera má ráð fyrir að listi yfir 20 stærstu hlutahafa Play hafi tekið nokkrum breytingum vegna hlutafjáraukningarinnar en Play hefur ekki birt uppfærðan lista.
Líkt og FF7 hefur áður fjallað um þá tók stærsti hluthafinn í Play ekki þátt í hlutafjárútboðinu með beinum hætti.
Með hlutafjáraukningunni þá hefur bilið á milli markaðsvirðis Icelandair og Play minnkað umtalsvert. Gengi hlutabréfa í Icelandair hefur lækkað um 22 prósent það sem af er ári og hefur það ekki verið lægra síðan í nóvember árið 2020.
FYRIR 70 KRÓNUR Á DAG FÆRÐU AÐGANG AÐ ÖLLUM GREINUM FF7 Í HEILT ÁR