Heimsferðir, Úrval Útsýn, Plúsferðir og Sumarferðir hafa gengið frá samningi við Neos flugfélagið um leiguflug til allra áfangastaða ferðaskrifstofanna í sumar og fram á næsta ár. Þetta ítalska flugfélagið hefur um árabil flogið farþegum ferðaskrifstofanna út í heim.
Í tilkynningu segir að ný flugvél með þráðlausu neti verði nýtt í ferðirnar og flugtímarnir séu miðaðir við fjölskyldur. „Allir flugtímar miða að því að gera sólarfríið eins fjölskylduvænt og hugsast getur. Brottfarir frá Keflavík eru klukkan níu að morgni og því lent í dagsbirtu á áfangastað. Heimflugin eru sömuleiðis miðuð að því að gera heimferðina þægilega fyrir fjölskyldur,“ segir í tilkynningu.
Ferðaskrifstofurnar bjóða í vor og sumar upp á reglulegar ferðir til Alicante, Almeria, Krítar, Verona og Tenerife. Þá verður einnig flogið til Zagreb, Split og Portúgal. Í haust bætast við áfangastaðir eins og Sikiley og Lecce á Ítalíu, Budva í Svartfjallalandi, Punta Cana í Karabíska hafinu og Kanarí.
Ferðaskrifstofurnar munu einnig bjóða upp á ferðir frá Akureyri til Tenerife, Alicante og Calarbria á Ítalíu. Frá Egilsstöðum verður á boðstólum borgarferð til Verona.
Það verða ekki aðeins íslenskir ferðamenn í þotum Neos því til stendur að selja tvö þúsund flugsæti hingað til lands til ítalskra ferðaskrifstofa og mun Alpitours, stærsta ferðaskrifstofa Ítalíu, sjá um söluna.
