Það þarf ekki lengur að borga fyrir netaðgang á flugvöllum í Finnlandi og Svíþjóð. Þar með er þessi þjónusta ókeypis alls staðar á Norðurlöndunum nema hér á landi.
Það kostar töluvert að setja snallsíma og tölvur í samband við net í útlöndum. Það er því ánægjulegt að frændþjóðirnar veita nú ferðalöngum þessa þjónustu án endurgjalds. Danir og Norðmenn gáfu gjaldið eftir á síðasta ári en nýverið bættust Svíar og Finnar við. Það eru því aðeins flugfarþegar hér á landi sem þurfa að borga fyrir netaðgang. Nemur gjaldið 490 krónum á klukkustund Keflavíkurflugvelli.
Líka síðust með „app“
Snjallsímaforrit flugstöðva eru orðin sjálfsagður hlutur víða í Evrópu. Með þeim geta farþegar m.a. nálgast upplýsingar um breytingar á ferðaáætlunum og fengið aðstoð við að rata um flugstöðvar. Forsvarsmenn Kaupmannahafnarflugvallar hafa nýtt sér þessa tækni um árabil með góðum árangri og kollegar þeirra í Skandinavíu og Finnlandi hafa einnig tekið tækninni fagnandi. Ekkert snjallsímaforrit hefur hins vegar litið dagsins ljós frá Keflavíkurflugvelli en samkvæmt upplýsingum þaðan mun málið vera til skoðunar og einnig gjaldið vegna netaðgangs.
TENGDAR GREINAR: Keflavíkurflugvöllur á meðal 100 bestu
NÝJAR GREINAR: Fjör á fjórtánda stræti í Washington
Mynd: Cph
