Af þeim 407 ferðum sem farnar voru til útlanda frá Keflavíkurflugvelli seinni hluta september seinkaði aðeins tuttugu og fjórum. Þrjár af hverjum fjórum eru á vegum Icelandair.
Farþegaþotur Icelandair flugu héðan til útlanda rúmlega þrjú hundruð sinnum síðastliðnar tvær vikur. Þær voru á réttum tíma í 95 prósent tilvika. Einni af fjörtíu og þremur brottförum Iceland Express seinkaði og allar þrettán ferðir WOW air voru á tíma. Síðastnefnda félagið hefur dregið töluvert úr framboði sínu og er nú fjórða umsvifamesta félagið á Keflavíkurflugvelli því SAS flaug daglega til Osló á tímabilinu. Þremur brottförum skandinavíska félagsins seinkaði og var stundvísi þess 80 prósent.
Norwegian, easyJet, Air Greenland og Primera Air héldu einnig úti áætlunarflugi héðan á tímabilinu en í mun minni mæli en þau fjögur sem finna má í stundvísiútreikningum Túrista að þessu sinni.
Aukið vægi Icelandair
Í júlí stóð Icelandair undir tveimur þriðju af öllu millilandaflugi héðan samkvæmt talningu Túrista. Nú þegar dregið hefur úr ferðum til og frá landinu þá eykst vægi félagsins töluvert og á seinni helmingi nýliðins mánaðar voru þrjár af hverjum fjórum ferðum farnar með vélum Icelandair.
Stundvísitölur seinni hluti september
| 16.-30.sept. | Hlutfall brottfara á tíma | Meðalseinkun brottfara | Hlutfall koma á tíma | Meðalseinkun koma | Hlutfall ferða á tíma | Meðalseinkun alls | Fjöldi ferða |
| Icelandair | 95% | 2 | 85% | 5 | 90% | 3 | 622 |
| Iceland Express | 98% | 12 | 100% | 0 | 99% | 6 | 88 |
| SAS | 80% | 1 | 93% | 1 | 87% | 1 | 30 |
| WOW air | 100% | 0 | 77% | 4 | 88% | 2 | 26 |
Um útreikningana: Daglega reiknar Túristi út hversu mikill munur er á áætluðum komu- og brottfaratímum og þeim tímasetningum sem gefnar eru upp fyrir lendingar og flugtak á heimasíðu Keflavíkurflugvallar. Þar sem seinkun um korter telst vera innan skekkjumarka í fluggeiranum þá eru fimmtán mínútur dregnar frá öllum seinkunum. Flug sem tefjast um minna en stundarfjórðung teljast vera á áætlun.
Fylgstu með Túrista á Facebook
NÝTT: Vegvísir Berlín
TENGDAR GREINAR: Stundvísitölur fyrri hluta september
