Samfélagsmiðlar

Segir Samkeppniseftirlitið leggja sér orð í munn

Í dag sendi Samkeppniseftirlitið frá sér tilkynningu vegna viðtals Túrista við fyrrum forstjóra Iceland Express. Hann segist þó ekki kannast við þau orð sem eftirlitið eignar honum.

Það eru þrír mánuðir síðan að Samkeppniseftirlitið úrskurðaði að Wow Air skyldi fá aðstöðu á Keflavíkurflugvelli til að hefja flug til Bandaríkjanna á umbeðnum tímum. Áfrýjunarnefnd samkeppnismála hefur hins vegar frestað réttaráhrifum úrskurðarins. Skúli Mogensen, forstjóri Wow Air, sagði þá ákvörðun setja áform félagsins um flug til Bandaríkjanna í uppnám. Hann sakaði jafnframt Isavia, rekstraraðila Keflavíkurflugvallar, um að vernda hagsmuni Icelandair. Í viðtali við Túrista á föstudaginn tók Skarphéðinn Berg Steinarsson, fyrrum forstjóri Iceland Express, ekki undir þessa gagnrýni á Isavia og sagði jafnframt að flugtímarnir sem félagið hafði til flugs til Bandaríkjanna hefðu ekki reynst erfiðir. En Wow Air fékk sömu tíma úthlutaða í lok árs.

Í morgun sendi Samkeppniseftirlitið frá sér tilkynningu (sjá hér fyrir neðan) vegna viðtalsins og segir þar að yfirlýsingar Skarphéðins séu í ósamræmi við þau sjónarmið sem líst var í kvörtun Iceland Express til eftirlitsins í júní 2012. Skarphéðinn segir hins vegar að eftirlitið leggi honum orð í munn og segir vinnubrögðin forkastanleg eins og sjá má í svari hans til Túrista hér fyrir neðan.

Svar Skarphéðins Berg:

Í frétt á Túristi.is sl. föstudag var ég spurður hvernig þeir flugtímar sem Iceland Express hafði til Ameríkuflugs á sínum tíma hafi reynst. Ég svaraði því til að þetta hefði gengið ágætlega enda hefðu aðrir afgreiðslutímar á Keflavíkurflugvelli verið í samræmi við þá. Slíkt væri mikilvægt. Þá var ég spurður almennt um þá deilu sem uppi væri vegna þess að Wow telur þessa afgreiðslutíma ekki henta sér og svaraði ég því til að það væri undarlegt að hlutaðeigandi gætu ekki fundið lausn á þessu í sameiningu. Þá væri það mín reynsla af forsvarsmönnum ISAVIA að þeir væru jafnan reiðubúnir til að leita lausna á vandamálum sem kæmu upp. Tók fram að ég teldi þá ekki sérstaka hagsmunagæslumenn Icelandair.

Í orðsendingu Samkeppniseftirlitsins til fjölmiðla í dag er vísað í umfjöllun fjölmiðla frá því á föstudag og sagt að „[ég] furði [mig] á málarekstri gagnvart Isavia“ og að „Iceland Express hafi ekki átt í neinum vandkvæðum með að sinna flugi til Boston og New York árið 2011“. Þessi ummæli hafa mér vitanlega hvergi komið fram í fjölmiðlum. Hér leggur Samkeppniseftirlitið mér orð í munn. Ég hef aldrei furðað mig á einu eða neinu um einhvern málarekstur sem ég veit ekkert um. Þá væri fráleitt af mér að halda því fram að Iceland Express hafi ekki átt í nokkrum vandkvæðum með flug til Ameríku. Það hefðu hins vegar ekki verið umræddir brottfarartímar sem ollu vandræðum.

Á þeim tíma sem ég stýrði rekstri Iceland Express beindi félagið ýmsum athugasemdum og ábendingum til Samkeppniseftirlitsins. Stofnunin sá þá hins vegar aldrei ástæðu til að aðhafast í málefnum er vörðuðu félagið með líkum hætti og hún gerir nú í þágu Wow air.

Þessi ummæli sem Samkeppniseftirlitið eignar mér er uppspuni þeirra. Eini fjölmiðillinn sem ég ræddi við á föstudaginn og hafði eftir mér ummæli var Túristi.is. Hvergi er þar að finna þessi tilvitnuðu ummæli. Þessi vinnubrögð eru forkastanleg en koma svo sem ekki á óvart þegar forsvarsmenn Samkeppniseftirlitsins eru annars vegar. Þeir eiga það til að hlaupa hratt framúr sjálfum sér.

Yfirlýsing Samkeppniseftirlitins:

Á fjölmiðlum á föstudag er haft eftir Skarphéðni Berg Steinarssyni, fyrrverandi forstjóra Iceland Express, að hann furði sig á málarekstri gagnvart Isavia, en Wow Air hefur undanfarna mánuði leitað eftir flugafgreiðslutímum á Keflavíkurflugvelli, á tilteknum tímabilum dagsins, í því skyni að hefja Ameríkuflug í samkeppni við Icelandair. Samkeppniseftirlitið fjallaði um málið í ákvörðun nr. 25/2013 og beindi bindandi fyrirmælum til Isavia vegna málsins í því skyni að efla samkeppni.

Í fyrrgreindum fréttum er haft eftir Skarphéðni Berg Steinarssyni að Iceland Express hafi ekki átt í neinum vandkvæðum með að sinna flugi til Boston og New York árið 2011. Af þessu tilefni er rétt að fram komi að á þeim tíma sem Skarphéðinn vísar til hafði Samkeppniseftirlitið til meðferðar kvörtun frá Iceland Express þar sem félagið kvartaði undan alvarlegum samkeppnishindrunum sem stöfuðu af úthlutun flugafgreiðslutíma á Keflavíkurflugvelli. Í júní 2012, þegar Skarphéðinn var framkvæmdastjóri Iceland Express, barst Samkeppniseftirlitinu bréf frá félaginu þar sem fram kemur það mat að fyrirkomulag Isavia við úthlutun afgreiðslutíma hafi haft veruleg útilokunaráhrif fyrir Iceland Express og viðhéldi yfirburðarstöðu Icelandair í áætlunarflugi til og frá Íslandi. Einnig er vísað til þess að Isavia hafi með fyrirkomulaginu veitt Icelandair samkeppnisforskot og „einkarétt“ á bestu afgreiðslutímum á flugvellinum. Hafi Iceland Express m.a. þurft að hætta áætlunarflugi til Bandaríkjanna sem það hafði starfrækt árin 2010 og 2011.

Yfirlýsingar Skarphéðins Berg Steinarssonar um úthlutun Isavia á afgreiðlutímum eru því í ósamræmi við sjónarmið sem Iceland Express undir hans stjórn setti fram við Samkeppniseftirlitið um mitt ár 2012. Telur Samkeppniseftirlitið mikilvægt að opinber umræða um mikilvæg samkeppnismál fari fram á grundvelli réttra forsendna.

TILBOÐ: 25% AFSLÁTTUR Í LONDONÞRIÐJA NÓTTIN FRÍ Í EDINBORG
VINSÆLT: ER ÓDÝRARA AÐ LEIGJA BÍL MEÐ 3JA MÁNAÐA EÐA 3JA VIKNA FYRIRVARA?

Nýtt efni

Eftirspurn eftir ferðalögum til útlanda meðal Íslendinga er áfram sterk fullyrti Bogi Nils Bogason, forstjóri Icelandair, á kynningu á nýju uppgjöri flugfélagsins nú í morgun. Farþegum Icelandair frá heimamarkaðnum fækkaði hins vegar um 9 prósent á öðrum ársfjórðungi í samanburði við sama tímabil í fyrra. Þennan samdrátt útskýrði Bogi Nils með því að benda á …

Í byrjun júlí tóku gildi bráðabirgðatollar á rafbíla sem fluttir eru inn frá Kína til aðildarríkja Evrópusambandsins. Var gripið til þessa eftir að rannsókn á vegum Framkvæmdastjórnar Evrópusambandsins leiddi í ljós að kínverska framleiðslan nyti óeðlilega mikils ríkisstuðnings og skaði því evrópskir rafbílaframleiðendur. Aukatollurinn, sem nú leggst ofan á þann 10 prósent toll sem fyrir …

Á öðrum ársfjórðungi í fyrra hagnaðist Icelandair um 2,1 milljarð króna fyrir skatt en núna var niðurstaðan hagnaður upp á 73 milljónir króna. Í dollurum, uppgjörsmynt Icelandair, var rekstrarafkoman (Ebit) jákvæð um 3,3 milljónir dollara en 21 milljón í fyrra. Sú niðurstaða var sú besta í mörg ár eins og sjá má. Skilyrði til flugrekstrar …

Fyrir fjórum vikum síðan boðaði Lilja Dögg Al­freðsdótt­ir, menn­ing­ar- og viðskiptaráðherra, átak í markaðssetningu á Íslandi sem áfangastað fyrir ferðamenn. Segja má að ráðherrann hafi verið að svara kalli forsvarsfólks ferðaþjónustunnar sem hvatt hefur til opinberrar kynningar á Íslandi sem áfangastað líkt og víða tíðkast. Tveimur dögum eftir að Lilja Dögg lofaði „hundruðum millj­óna“ til …

Stjórnendur Icelandair og Play gáfu það út í sumarbyrjun að fargjöld hefðu lækkað vegna mikillar samkeppni í flugi yfir Atlantshafið. Félögin tvö þurfa nú í auknum mæli að sækja á þann markað þar sem minni eftirspurn er eftir Íslandsferðum. Gallinn er hins vegar sá að farþegar sem fljúga milli Evrópu og N-Ameríku, með millilendingu á …

Í júní í fyrra voru óvenju margir bandarískir ferðamenn á landinu miðað við flugframboð. Nú í sumar hefur flugferðunum fjölgað um 12 prósent en samt fækkaði bandarískum ferðamönnum um 19 prósent í nýliðnum júní. Það er Icelandair sem er langumsvifamest í flugi héðan til Bandaríkjanna og stóð félagið undir 7 af hverjum 10 flugferðum héðan …

Víðast hvar eru gistinætur útlendinga helsti mælikvarðinn á gang mála í ferðaþjónustu enda nær eingöngu eyríki að telja ferðafólk við landamæri með einföldum hætti. Hjá frændþjóðum okkar eru gistinæturnar því aðalmálið og nú fjölgar erlendu gestunum í Noregi þónokkuð frá fyrra ári en forsvarsfólk íslenskra ferðaþjónustufyrirtækja hefur undanfarna mánuði bent á harðnandi samkeppni við þau …

helsinki yfir

Hagstofur víða birta nú nýjar verðlagsmælingar sem flestar sýna að verðbólga er á niðurleið. Nú í morgunsárið var komið að finnsku hagstofunni og þar sýna tölur að verðlag hefur hækkað um 1,3 prósent síðastliðna 12 mánuði. Á milli maí og júní fór verðbólgan niður um 0,2 prósent. Það voru lækkandi húsnæðisvextir og fallandi verð á …