Dallas í Texas er ein af þeim borgum sem bættust við leiðakerfi Keflavíkurflugvallar í sumar og óhætt er að segja að samkeppnin á þessari nýju flugleið sé mikil. Íslensku flugfélögin bjóða nefnilega bæði upp á ferðir til borgarinnar og það gerir American Airlines líka. Það síðastnefnda bættist í hópinn eftir að forráðamenn Icelandair og WOW höfðu tilkynnt um nýtt flug til Dallas. Borgin er höfuðvígi American Airlines og var almennt litið á viðbrögð bandaríska flugfélagsins sem skilaboð til íslensku félaganna að þau skildu ekki gera sig breið í Texas.
Forsvarsfólk American Airlines hefur þó gert lítið úr þessum vangaveltum og sagt að flugið til Íslands hafi ekkert með komu íslensku félaganna til Dallas að gera. Hvað sem því líður þá er ljóst að fyrsta vertíð American Airlines á Íslandi hefur gengið vel. „Við erum mjög ánægð með frammistöðu þessarar flugleiðar og munum þess vegna halda áfram næsta sumar,“ segir Martha Thomas, upplýsingafulltrúi American Airlines. Hún gerir ráð fyrir að fyrirkomulagið verði álíka og nú í sumar, það er daglegar brottfarir og sú fyrsta farin í byrjun júní og sú síðasta í lok október.
Hjá Icelandair er hægt að bóka beint flug til Dallas í allan vetur og líka næsta sumar. Guðjón Arngrímsson, talsmaður félagsins, segir að flugið þangað hafi farið ágætlega af stað. „Sérstaklega í ljósi þess hversu mikil samkeppni hefur verið til staðar. Það bendir til þess að sá áhugi og kaupgeta sem við vonuðumst eftir að væri til staðar í Texas á Íslandsferðum og tengiflugi okkar til Evrópu sé raunveruleg og það lofar góðu.“
Aðspurð um framhaldið í Dallas þá segir Svanhvít Friðriksdóttir hjá WOW air að þotur félagsins muni fljúga til þangað fram til 26. október en vor- og sumaráætlun félagsins fyrir næsta ár liggi ekki fyrir. Það er því ekki ljóst hvort brottfarirnar héðan til Dallas verði að jafnaði 2 á dag næsta sumar en svo margar hafa þær verið síðustu vikur.
Samkvæmt tölum frá flugvellinum í Dallas þá flutti Icelandair samtals 4.479 farþega til og frá borginni í júní en hjá WOW air nam fjöldinn 6.649. WOW notar breiðþotur í ferðir sínar sem rúma 345 farþegar á meðan Icelandair styðst við 183 sæta Boeing þotur. Miðað við talningu Túrista á fjölda ferða þá hefur nýtingin hjá WOW air, í Dallasfluginu, verið 86,8 prósent í júní en 76,5 prósent hjá Icelandair. Tölur fyrir júlí liggja ekki fyrir.
Þess má geta að upplýsingar um farþegafjölda á einstökum flugleiðum eru ekki fáanlegar hjá Isavia. Túristi hefur kært þann upplýsingaskort og hefur úrskurðanefnd upplýsingamála veitt Isavia frest til 17. september til að færa rök fyrir ákvörðun sinni.
