Markaðsaðgerðin Let it Out, sem er hluti af markaðsverkefni Inspired by Iceland, hefur vakið mikla athygli erlendra fjölmiðla samkvæmt tilkynningu frá Íslandsstofu.
Þar segir að fjallað hafi verið Ísland og verkefnið á mjög jákvæðum nótum og fyrstu fimm daga aðgerðarinnar hefur hún verið til umfjöllunar í um 350 erlendum miðlum sem ná samanlagt til tæplega 1,5 milljarða
neytenda. „Virði þessarar umfjöllunar er metið sem 1,7 milljarður króna,“ segir í tilkynningunni.
Alls hafa tæplega 300.000 heimsóknir komið á vefsíðu herferðarinnar frá því hún fór í loftið og tekin hafa verið upp rúmlega 25.000 öskur. Kynningarmyndband herferðarinnar hefur alls verið spilað rúmlega 2.8 milljón sinnum.
„Árangur Let it Out herferðarinnar hefur farið fram úr björtustu vonum. Það er ljóst að hún hefur hitt beint í mark hjá markhópum Íslenskrar ferðaþjónustu og hefur vakið verðskuldaða athygli. Fólk kann sannarlega að meta að við sýnum aðstæðum þeirra skilning og bjóðum þeim upp á að losa um streitu, samhliða því sem við gefum þeim tækifæri til að skoða stórkostlega náttúru Íslands og vekja athygli þeirra á þeirri víðáttu sem hér er hægt að upplifa,“ segir Sigríður Dögg Guðmundsdóttir, fagstjóri ferðaþjónustu hjá Íslandsstofu.
Herferðin stendur í tvær vikur, en að því loknu verða hátalarnir teknir niður.
