Samfélagsmiðlar

Viðbúið að fjöldi ferðaþjónustufyrirtækja óski eftir greiðsluskjóli

Alþingi samþykkti um miðjan júní ný lög sem veita fyrirtækjum skjól fyrir kröfuhöfum á meðan unnið er að fjárhagslegri endurskipulagningu. Nú hafa tvö stór fyrirtæki í ferðaþjónustu nýtt sér þessa leið og fleiri gætu fylgt á næstunni.

Island seljalandsfoss taylor leopold

Til marks um samdrátt ferðaþjónustufyrirtækja þá fækkaði hótelnóttum útlendinga hér á landi í maí um 99 prósent.

Héraðsdómur hefur fallist á að veita tveimur af dótturfélögum Arctic Adventures leyfti til að fara í greiðsluskjól. Umsögn Gray Line á Íslandi um að nýta sér þetta nýja úrræði fékk sömuleiðis samþykki hjá dómstólum.

Gray Line og Arctic Adventure eru tvö af stærstu ferðaþjónustufyrirtækjum landsins en sú grein hefur farið sérstaklega illa út úr heimsfaraldrinum sem nú gengur yfir. Tekjur hafa hrunið og hafa mörg fyrirtæki gripið til fjölda uppsagna vegna ástandsins.

Í tilkynningu sem stjórn Gray Line sendi frá sér í lok síðustu viku segir að með því að fara í svokallað greiðsluskjól væri jafnræði lánadrottna og kröfuhafa best tryggt.

Styrmir Þór Bragason, framkvæmdastjóri Arctic Adventures, sagði í samtali við Fréttablaðið í gær að hið nýja úrræði um fjárhagslega endurskipulagningu, sem samþykkt var á Alþingi fyrr í sumar, gefi fyrirtækinu færi á að endurskipuleggja reksturinn í takt við nýjan raunveruleika.

Af samtölum Túrista við forsvarsfólk ferðaþjónustufyrirtækja að dæma þá er viðbúið að mun fleiri fyrirtæki í greininni muni óska eftir greiðsluskjóli á næstunni. Horfa þá flestir til þess að úrræðið gefur eigendum fyrirtækjanna vernd gagnvart lánadrottnum og kemur jafnframt í veg fyrir mögulega mismunun á milli kröfuhafa.

Stjórnendur Icelandair Group viðruðu svo möguleikann á að nýta þennan nýja valkost í tilkynningu sem félagið sendi frá sér í vikubyrjun. Þar sagði að ef samningaviðræður við kröfuhafa skila ekki árangri á næstunni þá gæti tekið við allt að tólf mánaða tímabili þar sem öllum greiðslum til fjármögnunaraðila félagsins yrði frestað.

Nýtt efni

Brasilíski flugframleiðandinn Embraer greinir frá góðum gangi í pöntunum og afhendingu véla á fyrstu mánuðum ársins. Mestur var fögnuðurinn í höfuðstöðvunum í São José dos Campos þegar American Airlines staðfesti kaup á 90 farþegaþotum af gerðinni E175, sem verða notaðar í innanlandsflugi og eru hluti af stórri endurnýjun flugflota félagsins. E175 eru meðaldrægar vélar, oftast …

Faxaflóahafnir héldu vorfund sinn fyrir helgi til að kynna fyrirtækjum í ferðaþjónustu skipulag sumarsins við móttöku skemmtiferðaskipa, sem tekur mið af því raski sem verður vegna byggingar farþegamiðstöðvar Faxaflóahafna. Þeim framkvæmdum á að ljúka að tveimur árum liðnum, eins og FF7 greindi nýverið frá. Fram kom á fundinum að gert er ráð fyrir rúmlega 308 …

Fréttaveitan Bloomberg sagði frá því á dögunum að mikil úlfúð ríkti í alþjóðlegu kolefnisvottunarsamtökunum Science Based Targets initiatives, eða SBTi.  Fyrirtæki um allar koppagrundir hafa lengi reitt sig á vottanir frá SBTi þegar þau hafa fullyrt að þau stefni að kolefnishlutleysi.  Yfirleitt er kannski lítil ástæða til þess að fólk kippi sér upp við slæman starfsanda og …

Þegar lent er á flugvelli á ESB-svæðinu bíður farþeganna ekki verslun með tollfrjálsan varning við töskubeltin. Þess háttar er aðeins í boði fyrir brottför. Í Evrópuríkjum utan ESB gefst hins vegar tækifæri til að kaupa ódýrara áfengi við komuna eins og við þekkjum frá Keflavíkurflugvelli. Þeir sem nýta tollinn sinn þar til að kaupa léttvín …

Þrjár þotur Loftleiða munu næstu misseri fljúga viðskiptavinum erlendra ferðaskrifstofa hringinn í kringum heiminn. Um borð eru sætin stærri og færri en í hefðbundnu áætlunarflugi enda kostar ferðalagið skildinginn. Hver farþegi borgar 25 milljónir fyrir ferðalag líkt og farið var yfir í fréttum Stöðvar 2.  Það er ekkert nýtt að Icelandair leigi þotu og áhöfn í …

Fyrir viku hélt Narendra Modi, forsætisráðherra Indlands, fund með helstu ráðgjöfum sínum, innanríkisráðherra og fulltrúum veðurstofu og almannavarna landsins til að ræða viðbrögð við hitatíðinni framundan, frá apríl til júní. Sérstaklega er talin ástæða nú til aðgæslu vegna áhrifa loftslagsbreytinga á veðurfar. Verulegar líkur eru taldar á að hiti fari fram úr venjulegum hámarkshita í …

Frumvarp um að veita þúsundum óskráðra innflytjenda á Spáni heimild til landvistar og atvinnu er nú til meðferðar í fulltrúadeild spænska þingsins (Congreso de los Diputados) eftir að 700 þúsund manns höfðu undirritað áskorun um setningu laga þessa efnis. Nærri 900 samtök studdu þessa áskorun um að breyta stöðu óskráðra útlendinga í landinu.  Ef fyrirliggjandi …