Líkt og ríkisstjórnin gaf út fyrir helgi þá þurfa allir að fara í fjögurra til fimm daga sóttkví við komuna til landsins frá og með miðvikudeginum. Bæði ráðamenn þjóðarinnar og forsvarsfólk ferðaþjónustunnar virðast á einu máli um að þessar hertu reglur muni draga verulega úr áhuga útlendinga að ferðast hingað til lands.
Í venjulegu árferði væri þó framundan annasamur tími í ferðaþjónustu. Ágúst er þannig sá mánuður sem flestir útlendingar fljúga frá landinu samkvæmt talningum Ferðamálastofu. September er svo fjórði vinsælasti mánuður ársins þegar horft er til brottfara erlendra ferðamanna frá Keflavíkurflugvelli.
Í september í fyrra komu hingað um 184 þúsund erlendir ferðamenn. Ef samdrátturinn að þessu sinni verður álíka og í nýliðnum júlí þá verða túristarnir rétt um 37 þúsund í næsta mánuði. Sem fyrr segir er þó almennt gert ráð fyrir að niðursveiflan verði meiri vegna hertari reglna hér á landi og aukinna ferðatakmarkana í Evrópu.
Þessi nýja krafa um sóttkví fyrir alla gæti þó komið ferðamönnum sem nú eru að pakka í töskur fyrir Íslandsferð á óvart. Alla vega þeim sem leita í dag upplýsinga um stöðu mála á heimasíðum Keflavíkurflugvallar eða á Covid.is sem embætti landlæknis og almannavarnadeild lögreglunnar halda úti.
Á þessum opinberu síðum er nefnilega ekkert að finna um hinar nýju hertu reglur sem kynntar voru á föstudag. Vefur Icelandair hefur aftur á móti verið uppfærður en það félag stendur fyrir minna en helmingi allra flugferða til og frá Keflavíkurflugvelli þessa dagana. Erlendu flugfélögin virðast fæst tiltaka sérstaklega hvernig reglurnar eru í hverju landi fyrir sig varðandi ferðalög nú á tímum Covid-19.
Uppfært: Í upphaflegri útgáfu sagði að engar upplýsingar væri heldur að finna á heimasíðu Visit Iceland. Samkvæmt upplýsingum frá Íslandsstofu þá voru nýju reglurnar settar inn á þá síðu á laugardagsmorgun en þó aðeins sjáanlegar með því að smella á hlekk neðst á forsíðunni. Eftir birtingu fréttar Túrista var hlekkurinn færður ofar á Visit Iceland og er því sýnilegri en áður. Covid.is var einnig uppfærð eftir umfjöllun Túrista.