Þær ferðamannaspár sem gerðar voru síðastliðinn áratug gengu sjaldnast eftir. Ferðamennirnir voru alltaf nokkru fleiri en gert var ráð fyrir. Jafnvel þó það hafi verið mun einfaldara að spá í stöðuna þá en núna á tímum Covid-19.
Hér verður engu að síður gerð tilraun til að reikna út fjöldan á næsta ári og til grundvallar er farþegaáætlunin sem Icelandair kynnti í nýverið í fjárfestakynningu sinni. Félagið stendur nefnilega undir stórum hluta af ferðamannastraumnum ef svo má segja.
Þannig hafa um fjórir af hverjum tíu ferðamönnum sem hingað komu árið 2018 flogið með Icelandair. Byggja þessir útreikningar á hlutfalli farþega félagsins sem hefja ferðalagið í útlöndum og eru ekki á leið í tengiflug. Einnig er gert ráð fyrir að fjórðungur þeirra farþega sem kaupir tengiflug með félaginu stoppi hér á landi yfir alla vega eina nótt líkt og var raunin árið 2018.
Í fyrra jókst svo vægi Icelandair á Keflavíkurflugvelli og þá hefur félagið flutt rétt rúmlega helming allra þeirra erlendu ferðamanna sem hingað komu. Þessi aukna hlutdeild Icelandair í ferðamannastraumnum hingað skrifast ekki aðeins á fall WOW air. Heldur líka á minni áherslu hjá Icelandair á farþega sem eru á leið yfir Norður-Atlantshafið. Samkeppnin á þeim markaði var nefnilega orðin of hörð og fargjöldin lág.
„Við erum viljandi, út af krefjandi aðstæðum á Via-markaði, að stýra tekjumynduninni inn á To and From,“ sagði Eva Sóley Guðbjörnsdóttir, framkvæmdastjóri fjármála hjá Icelandair, til að mynda á afkomufundi félagsins í apríl í fyrra.
Og miðað við yfirlýsingar stjórnenda Icelandair í aðdraganda hlutafjárútboðsins í síðasta mánuði þá verður áherslan hjá þeim áfram á ferðamenn á leið til landsins á kostnað tengifarþega. Á sama tíma gerir áætlun félagsins ráð að farþegar verði 1,4 milljónir á næsta ári.
Og þá ber að hafa í huga að hver farþegi er talinn á hvern fluglegg. Einstaklingur sem flýgur til Íslands frá New York og heim aftur er því tvítalinn.
Ef hlutfall erlendra ferðamanna í farþegahópi Icelandair á næsta ári verður álíka og árið 2019 þá þýðir það í raun að félagið mun fljúga rétt um 320 til 340 þúsund túristum til landsins. Þar með kæmu í mesta lagi rétt um 650 þúsund ferðamenn til landsins árið 2021 ef Icelandair stendur undir jafn stórum hluta markaðarins og í fyrra.
Fari hlutdeild Icelandair niður í það sem hún var árið 2018 þá myndum við fá um 800 þúsund ferðamenn til landsins á næsta ári. Þá skiptir sköpum að erlend flugfélög sinni Íslandsflugi af meiri krafti og þá yfir stærri hluta ársins. Sérstaklega næsta haust og vetur ef næstu mánuðir vera álíka erfiðir og þeir síðustu.
Nýtt íslenskt flugfélag hefur vissulega líka mikið segja en fyrsta árið ætti það félag mun auðveldara með að koma sér á framfæri gagnvart íslenskum farþegum en síður gagnvart útlendingu.
Aukin áhersla erlendra flugfélaga eins og Delta, easyJet, Wizz Air og Lufthansa á Íslandsflug gæti aftur á móti gjörbreytt landslaginu og eflt ferðaþjónustuna til muna.
Það er aftur á móti fyrirséð að flugvellir út um allan heim munu berjast um ferðir flugfélaga þegar einfaldara verður að ferðast á milli landa en nú er. Stjórnendur Isavia gætu því þurft að veita afslætti og gjörbreyta gjaldskrám ef ætlunin er að fá flugfélög til að horfa í auknum mæli til Íslands sem áfangastaðar.
Hér að ofan er eingöngu spáð í ferðamannastrauminn um Keflavíkurflugvöll. Til viðbótar kemur svo hingað fjöldi fólks með Smyril-line til landsins, skemmtiferðaskipum og svo um aðra flugvelli.
