Það lá fyrir strax í byrjun þessa árs að Keahótelin myndu ekki endurnýja fimmtán ára leigusamning á rekstri Hótels Norðurlands. Þar með urðu gististaðirnir innan vébanda Keahótelanna níu talsins.
Núna hefur hótelsamsteypan sagt skilið við Exeter hótelið í Tryggvagötu í Reykjavík. Það hótel var opnað fyrir tveimur árum síðan en hefur verið lokað síðustu mánuði vegna ástandsins sem Covid-19 hefur valdið.
Á Exeter hótelinu eru 106 herbergi auk veitingastaða en eigandi fasteignarinnar er Tryggvagata ehf. Meirihlutaeigandi í því félagi er svo fasteignaþróunarfélagið Festir sem er í eigu Ólafs Ólafssonar, oft er kenndur við Samskip.
Í samtali við Túrista staðfestir Róbert Róbertsson, framkvæmdastjóri Festis, að eigendur Exeter hótelsins hafi fyrir stuttu síðan tekið reksturinn yfir samkvæmt samkomulagi við Keahótelin.
Aðspurður segir Róbert að ekki hafi verið leitað til annarra um rekstur hótels í byggingunni. Ástæðan er sú að nú ætla eigendur byggingarinnar sjálfir að sjá um reksturinn og þá undir sama nafni og með álíka áherslum og gert hefur verið fram til þessa.