Af stærstu flugvöllum Norðurlanda er Kaupmannahafnarflugvöllur sá eini sem er ekki alfarið í opinberri eigu. Og þar á bæ hafa flugvallargjöldin verið það há að stjórnendum SAS hefur verið nóg boðið. Síðustu ár hafa þeir reglulega gagnrýnt gjaldtökuna opinberlega og í mótmælaskyni fluttu þeir meira af starfseminni til Óslóar og Stokkhólms. Flugvellirnir í þeim borgum eru í opinberri eigu.
Mörg dæmi eru um álíka deilur milli flugfélaga og flugvallaryfirvalda en það hefur lítið farið fyrir slíku hér á landi. Stjórnendur Icelandair hafa til að mynda ekki sett út á verðskrá Keflavíkurflugvallar opinberlega síðustu ár. Jafnvel þó tekjur flugvallarins, á hvern farþega, hafi verið sextíu prósent hærri en almennt gerist á evrópskum flugvöllum samkvæmt úttekt OECD. Þar kemur líka fram að Keflavíkurflugvöllur er einn dýrasti flugvöllur álfunnar.
Stjórnendur Icelandair létu þó í sér heyra þegar í ljós kom að helsti keppinautur þeirra, WOW air, hafði fengið að nýta Keflavíkurflugvöll án greiðslu í meira en eitt ár. Sú gagnrýni snéri þó ekki að gjaldskránni.
Gjaldtakan á Keflavíkurflugvelli hefur heldur ekki verið í umræðunni í tengslum við áform Icelandair um byggingu flughafnar í Hvassahrauni. Þar virðist helst horft til kosta þess að tengja saman alþjóða- og innanlandsflug líkt og tíðkast í rekstri annarra flugfélaga.
Í ljósi þess hve stjórnendur Icelandair og Isavia ganga í takt á opinberum vettvangi má velta fyrir sér hvort niðurstöður OECD byggi á réttum upplýsingum. Þess má svo geta að Icelandair sparaði sér hátt í fjögur hundruð milljónir í sumar tímabundinni niðurfellingu flugvallargjalda á Keflavíkurflugvelli.
Túristi hefur óskað eftir viðbrögðum frá Isavia og Icelandair um skýrslu OECD. Svör fyrirtækjanna verða birt þegar þau berast.
