Kröfuhafar og flugvélaleigur hafa haldið um stjórnartaumana í Norwegian frá því að fjárhagur flugfélagsins var endurskipulagður í vor. Það hefur þó alltaf legið fyrir að þessir aðilar munu ólíklega veita félaginu þann fjárhagslega stuðning sem þörf er á.
Sá bjargvættur sem stjórnendur norska flugfélagsins hafa helst horft til að undanförnu gaf þeim svar sitt í morgun og forstjórinn líkir niðurstöðunni við kjaftshögg.
Það liggur nefnilega núna ljóst fyrir að ríkisstjórn Noregs ætlar ekki að veita félaginu þann viðbótar stuðning sem leitað hafði verið eftir. Þetta tilkynnti Iselin Nybø, viðskiptaráðherra Noregs, í morgun.
Í framhaldinu sendi Norwegian frá sér tilkynningu þar sem segir að framtíð Norwegian sé nú mjög óljós en allt verði gert til að koma félaginu í gegnum krísuna.
Jakob Schram fer ekki leynt með vonbrigði sín í tilkynningu morgunsins. Hann bendir á að framlag Norwegian til norska þjóðarbúsins nemi um 18 milljörðum norskra króna á ári og um 24 þúsund manns hafi lifibrauð sitt af starfsemi félagsins.
Forstjórinn telur líka að stuðningur Norðmanna við fluggeirann í heimsfaraldrinum sé of lítill í samanburði við það sem þekkist víða annars staðar. Norwegian fékk þó þrjá milljarða norskra króna í stuðning frá norska ríkinu í vor. Aftur á móti tapar félagið um hálfum milljarði norskra kr. á mánuði eins og staðan er í dag.
Samkvæmt fréttum norska viðskiptablaðsins Dagens Næringsliv þá eru ekki margir kostir í stöðunni fyrir Norwegian í dag. Helst er það aðkoma erlends vogunarsjóðs sem gæti bjargað félaginu núna að mati viðmælenda blaðsins.
Það er engum blöðum um það að fletta að aukin Norwegian hefur reynst Icelandair erfiður keppinautur um þá farþega sem horfa mest í peninginn. Fargjöld Norwegian hafa nefnilega verið lág og ferðirnar tíðar frá mörgum evrópskum borgum. Þar með hefur hinn almenni farþegi haft kost á því að komast beint yfir hafið fyrir lítið í stað þess að þurfa að millilenda á Keflavíkurflugvelli.
Norwegian hefur einnig verið stórtækt í flugi til og frá Íslandi og var þannig það félag sem flutti flesta milli Íslands og Spánar áður en heimsfaraldurinn setti þær ferðir úr skorðum.
