Nærri fjörutíu þúsund franskir ferðamenn heimsóttu Ísland sumarið 2019. Aðeins Bandaríkjamenn, Þjóðverjar og Kínverjar voru þá fjölmennari í hópi túrista hér á landi.
Þrátt fyrir hinn stóra markað í Frakklandi þá hefur flug Icelandair þangað alltaf takmarkast við flug til og frá París. WOW air hélt hins vegar úti ferðum bæði frá höfuðborginni en líka Lyon. Eitt sumarið spreytti félagið sig einnig á frönsku riveríunni, nánar tiltekið í Nice.
Fransk-hollenska lággjaldaflugfélagið hefur svo veitt íslenskum flugfélögum samkeppni í París en í fyrra bætti félagið við ferðum hingað frá Nantes í vesturhluta Frakklands.
Ferðirnar þaðan voru hins vegar ekki settar í sölu á ný fyrir komandi sumar en nú hefur Transavia bætt úr því. Á heimasíðu félagsins er því á nýjan leik hægt að bóka áætlunarflug frá Nantes til Íslands í sumar. Viðtökurnar við þessa flugleið voru góðar í fyrrra líkt og Túristi fjallaði um á sínum tíma.
Þá sagði talskona félagins að það væri mikill áhugi á ferðum til Íslands meðal íbúa Nantes og nágrenni. „Fólk á svæðinu kann að meta að geta flogið beint til Íslands og áhuginn er mestur meðal þeirra sem vilja heimsækja áfangastaði þar sem nátturan er í aðalhlutverki,“ bætti hún við.
Brottfarir Transavia frá Nantes til Íslands eru á aðeins á dagskrá frá byrjun júlí og fram í september. Flogið er á 189 sæta Boeing þotum og í heildina verða sæti fyrir sautján hundruð farþega.
Þess má geta að stærsta flugfélag Frakklands, Air France, hefur látið íslenska markaðinn alveg vera en Transavia tilheyrir reyndar Air France/KLM samsteypunni. En einn af stjórnendum þess fyrirtækis á árunum 2015 til 2017 var Nína Jónsson sem situr í stjórn Icelandair í dag.
