Ennþá eru landamæri Bandaríkjanna lokuð öðrum en íbúum landsins. En verði þau opin í sumar þá munu farþegar hér á landi geta valið á milli ferða tveggja flugfélaga til borgarinnar Chicago.
Bandaríska flugfélagið United tilkynnti nefnilega í gær að frá og með 2. júlí og fram í byrjun október myndu þotur félagsins fljúga daglega frá Keflavíkurflugvelli til O´Hare flugvallar í útjaðri Chicago.
Sala á farmiðum er nú hafin á heimasíðu United og kosta þeir ódýrustu 57.745 krónur fyrir þá sem kaupa miða báðar leiðir og dvelja úti í eina viku. Dýrustu miðarnir, á hefðbundið farrými, kosta 69.245 kr.
Hjá Icelandair eru fargjöldin í sumar til Chicago aðeins hærri. Sá sem ætlar að vera út í viku borgar að minnsta kosti 64.205 kr. fyrir flugmiðann hjá félaginu. Dýrustu sætin á Economy farrými kosta 91.205 krónur.
Betri sætanýting eftir að Wow hvarf af markaðnum
Á árunum 2018 og 2019 stóð flugið til og frá Chicago undir um tíund af þeim hópi farþega sem nýttu sér ferðir Icelandair til og frá Bandaríkjunum. Og sætanýtingin í ferðum félagsins batnaði eftir að Wow air heltist úr lestinni.
Þannig var nýtingin að jafnaði 77 prósent hjá Icelandair árið 2018 en árið eftir fór hún upp í áttíu prósent samkvæmt tölum frá bandarískum flugmálayfirvöldum sem Túristi hefur unnið úr.
