Þegar flugsamgöngur til og frá landinu náðu hámarki, á árunum 2017 og 2018, þá buðu íslensku flugfélögin tvö og Air Canada upp á ferðir milli Íslands og Montreal. Þangað flugu þotur WOW air meira að segja allt árið um kring.
Icelandair og Air Canada tóku ekki við vetrarferðunum eftir brotthvarf WOW air og létu áfram ferðir yfir sumarmánuðina duga. Kanadískum ferðamönnum fækkaði svo töluvert hér á landi árið 2019 eins og sjá má á súluritinum hér fyrir neðan.
Áætlun Icelandair fyrir komandi sumar gerði ráð fyrir að félagið tæki upp þráðinn í Montreal á ný nú í sumarbyrjun en af því verður ekki. Allar ferðir til þessarar næst fjölmennustu borgar Kanada hafa verið teknir úr bókunarvél félagsins.
Stjórnendur Air Canada hafa einnig tekið út allar sínar ferðir til Íslands frá Montreal en gera áfram ráð fyrir fjórum ferðum í viku frá Toronto til Keflavíkurflugvallar. Fyrsta ferð er á dagskrá í byrjun júlí og verða 169 sæta Boeing MAX 8 þotur nýttar í Íslandsflug Air Canada í sumar.
Útgerð Icelandair í Kanada í sumar mun einskorðast við ferðir til Toronto og til Vancouver. Áður flaug félagið til fimm kanadískra borga.