Flugáætlanir flugfélaga fyrir sumarið eru ennþá í lausu lofti og óvenju hátt hlutfall farþega bókar farmiða með mjög stuttum fyrirvara. Vonir standa þó til að fólk fari að skipuleggja ferðalög sín lengra fram í tímann nú þegar fjöldi bólusettra eykst hratt.
Og nú liggur fyrir að stjórnendur Delta flugfélagsins hafa ákveðið að bæta Íslandi á ný við vetraráætlun sína. Á heimasíðu Delta er nefnilega hægt að bóka flug með félaginu allan næsta vetur frá JFK flugvelli í New York til Íslands.
Þetta verður fjórða vetrarvertíð flugfélagsins hér á landi því á árunum 2016 til 2019 flugu þotur Delta hingað allt árið um kring.
Þá voru Boeing 757 þotur nýttar í ferðirnar en núna gerir Delta ráð fyrir að nota Boeing 767 breiðþotur. Í þeim eru sæti fyrir 226 farþega og þar af eru 26 sæti á fremsta farrými.
Til samanburðar eru 168 sæti í Boeing 757 þotunum sem Delta hóf að fljúga til Íslands um síðustu helgi.
Síðar í maí bætast við daglegar ferðir hingað á vegum Delta frá bæði Minnepolis og Boston.
