Það er í ágúst ár hvert sem fjöldi ítalskra ferðamanna hér á landi nær hámarki. Yfir vetrarmánuðina koma svo hlutfallslega mun færri túristar hingað frá Ítalíu en frá Frakklandi og Spáni.
Megin skýringin á því gæti legið í litlum sem engum flugsamgöngum milli Íslands og Ítalíu utan háannatímans. En nú ætla stjórnendur Wizz Air að veðja á að Ítalir vilji ferðast til Íslands í auknum mæli yfir vetrarmánuðina. Félagið hefur nefnilega á boðstólum Íslandsflug frá þremur ítölskum borgum næsta vetur og samtals nemur framboðið um 6.500 sætum í hverjum mánuði.
Til samanburðar komu að jafnaði um 2.500 ítalskir ferðamenn til Íslands veturinn 2017 til 2018. Veturinn eftir spreytti Norwegian sig á flugi hingað frá Róm og þá fjölgaði ítölsku ferðamönnunum um þriðjung.
Ef áætlunarflug Wizz Air til Íslands frá Mílanó, Róm og Napólí fær ágætis undirtektir meðal Ítala þá er ljóst að fjöldi þeirra hér á landi næsta vetur verður miklu meiri en áður. Og það eru góð tíðindi fyrir ferðaþjónustuna út á landi því þeir ítölsku túristar sem sækja Ísland heim yfir veturinn eru líklegri til að gista utan höfuðborgarsvæðisins en ferðamenn gera almennt.
Með þessum auknu flugsamgöngum milli Íslands og Ítalíu stefnir líka í að Íslendingar muni fjölmenna til fleiri staða á Ítalíuskaganum næsta vetur en bara til skíðasvæðanna nyrst í landinu.
