Gistinóttum útlendinga á íslenskum hótelum fjölgaði í nýliðnum júní frá sama tíma í fyrra. Þetta var viðbúið enda voru íslensk landamæri næstum lokuð fram í miðjan júní í fyrra vegna útbreiðslu kórónaveirunnar.
Það er fæst því betri mynd af stöðu mála með því að bera saman gistinætur í nýliðnum júní við það sem var í júní í hittifyrra. Og niðurstaðan er sú að þær voru nærri því fjórum sinni færri í ár.
Þegar fjöldinn er skoðaður eftir þjóðum kemur svo í ljós að í öllum tilvikum nema einu fækkaði nóttunum. Ísraelar voru eina þjóðin sem bætti við gistinóttum og voru þær fjórðungi fleiri á íslenskum hótelum í júní sl. en á sama tíma árið 2019.
Af þeim sökum kemst Ísraelar að þessu sinni inn á lista yfir þær tíu þjóðir sem voru fjölmennastar á hótelum landsins í síðasta mánuði.
Sem fyrr þá halda ísraelskir túristar á Íslandi sig að mestu á hótelum á höfuðborgarsvæðinu og á Suðurlandi. Þar er meginpartur gistinátta þeirra en núna jókst ásókn Ísraela töluvert í gistingu á Suðurnesjunum. Gistinæturnar þar voru þrefalt fleiri en í júní 2019.
Þess má geta að eingöngu er hægt að greina mánaðarlegar gistináttatölur eftir þjóðernum þegar kemur að hótelgistingu. Þar með er ekki hægt að skoða ásókn mismunandi þjóða í gistiheimili, orlofsíbúðir og aðra kosti eftir mánuðum.
Það var fyrst nú í júlí sem tvö ísraelsk flugfélög hófu að fljúga hingað til lands á vegum ferðaskrifstofa. Það má því gera ráð fyrir að uppsveiflan í heimsóknum Ísraela til Íslands haldi áfram nú í sumar.
