Vegna fjölgunar kórónuveirusmita í mörgum löndum heims er íbúum Íslands ráðlagt að ferðast ekki að nauðsynjalausu til skilgreindra áhættusvæða.
Og samkvæmt skilgreiningu sóttvarnaryfirvalda þá er Grænland eina landið sem ekki flokkast sem áhættusvæði. Þetta kemur fram í tilkynningu sem birt var í gær á vef embættis landlæknis.
Kvóti á flugferðir
Sóttvarnaryfirvöld á Grænlandi hafa nú í heimsfaraldrinum haldið landinu lengst af lokuðu. Nú mega útlendingar hins vegar ferðast þangað á ný en gerð er krafa um að þeir sem ekki hafa verið fullbólusettir fari í fimm daga sóttkví. Eins verða allir að hafa með sér nýtt PCR-próf við komuna til Grænlands.
Grænlensk stjórnvöld takmarka einnig framboð á flugi til landsins og þannig hefur Icelandair aðeins heimild til að fljúga þangað einu sinni í viku með þrjátíu farþega. Félagið ákvað að nýta kvótann fyrir flug til Nuuk.
„Þetta er mun minni tíðni en í venjulegu árferði og flugið er meira og minna fullbókað,“ segir Guðni Sigurðsson, upplýsingafulltrúi Icelandair.
Bæta fljótlega við annarri ferð frá Akureyri
Norlandair hóf farþegaflug frá Akureyri til Nerlerit Inaat, við austurströnd Grænlands, á nýjan leik þann 1.júlí sl. Auk þess hefur félagið flogið þangað með frakt einu sinni í viku.
Farþegaflugið er á miðvikudögum og fljótlega verðu annarri ferð bætt við að sögn Friðriks Adólfssonar, framkvæmdastjóra Norlandair. „Við erum bara að finna hver þörfin er,“ bætir hann við.
Í byrjun ágúst hefst svo áætlunarflug Norlandair til Nerlerit Inaat frá Reykjavíkurflugvelli sem er hluti af samningi flugfélagsins við heimastjórn Grænlendinga.
Auk Norlandair og Icelandair, áður Air Iceland Connect, þá hefur Air Greenland haldið úti ferðum milli nágrannaþjóðanna. Fyrsta ferð Air Greenland til lands er á dagskrá þann 11. september. Flogið verður milli Nuuk og Keflavíkurflugvallar.
