Ekkert varð af áætlunarflugi Air Canada til Íslands í fyrra og heldur ekki í ár enda er Kanada í raun ennþá lokað. Íbúar landsins verða að fara í sóttkví við heimkomuna og ferðamönnum er ekki hleypt yfir landamærin þó þeir hafi verið bólusettir.
Strax í vor gáfu stjórnendur Air Canada frá sér flug til Íslands í sumar en þeir sjá þó tækifæri í að snúa tilbaka næsta vor. Bæði með áætlunarferðir frá Montreal og Toronto.
Það staðfestir Marc Sam, svæðisstjóri Air Canada á Norðurlöndunum, í svari til Túrista. Hann segir ætlunina að fljúga fjóra ferðir í viku frá Toronto og þrisvar í viku frá Montreal líkt og áður.
Í báðum tilvikum verða Boeing MAX þotur nýttar í ferðirnar til Keflavíkurflugvallar. Þess háttar flugvélar fluttu líka farþega kanadíska flugfélagsins hingað sumarið 2018 en eftir að kyrrsetningu MAX þota á heimsvísu þá varð Air Canada að nota litlar Airbus A319 í ferðirnar til Íslands. Þar með dró nokkuð úr sætaframboðinu.
Gera má ráð fyrir að næsta sumar hafi farþegar úr ferðum alla vega þriggja flugfélaga að velja þegar ferðast á milli Íslands og Toronto. Sú borg er fastur liður í leiðakerfi Icelandair og áður hefur komið fram að stjórnendur Play horfa til borgarinnar.
Til viðbótar þá hefur kanadíska flugfélagið Westjet haft til skoðunar að fljúga hingað til lands frá bæði Toronto og Calgary. Að öllu óbreyttu er því útlit fyrir harða samkeppni í áætlunarflug milli Íslands og fjölmennustu borgar Kanada.
Þess má geta að áætlunarflug Icelandair til Kanada liggur ennþá niðri en félagið áformar nú að hefja flug til Toronto á nýjan leik þann 4. ágúst. Aftur á móti er ekki lengur að finna neitt beint flug til Vancouver á heimasíðu flugfélagsins. Sú borg var þó hluti af upphaflegri sumaráætlun Icelandair.
