Afkoman af áætlunarflugi Icelandair til Baltimore sumarið 2018 var ekki nægjanlega góð og því tók félagið ekki upp þráðinn á ný árið eftir.
Það eru jafnframt vísbendingar um að farþegatekjur félagsins hafi lækkað um ríflega eitt hundrað milljónir króna við það eitt að fara í samkeppni við Wow Air í borginni þetta eina sumar.
Þrátt fyrir það ætla stjórnendur Icelandair að reyna aftur næsta sumar. Ein af skýringunum á því er vafalítið boðað flug Play til Bandaríkjanna en félagið horfir til Baltimore sem áfangastaðar þar í landi.
Frá miðborg Washington DC er nefnilega álíka langt í flugvöllinn í Baltimore og það er til Washington Dulles flugvallar. En þangað hefur Icelandair flogið síðan árið 2011 á meðan Wow Air hélt til í Baltimore.
Sumarið 2018 skoraði Icelandair hins vegar Wow Air á hólm í Baltimore enda var flugfélag Skúla Mogensen orðið stórtækt þar í borg. Ferðum Icelandair til Washington svæðisins fjölgaði samtals um nærri tíund þetta sumar samkvæmt talningu Túrista.
Aftur á móti fækkaði farþegunum um borð í vélum Icelandair um ríflega fjögur þúsund eða fimm af hundraði samkvæmt tölum frá bandarískum flugmálayfirvöldum. Farþegum Wow Air fjölgaði aftur á móti eins og sjá má á grafinu hér fyrir neðan.
Varlega má áætla að tekjutap Icelandair af þessum samdrætti hafi numið ríflega eitt hundrað milljónum króna yfir þetta fjögurra mánaða tímabil.
Sem fyrr segir þá ætlar Icelandair að spreyta sig í Baltimore á ný næsta sumar og þar með ljóst að Play fær ekki að koma sér fyrir í næði í borginni líkt og Wow Air fékk á sínum tíma.
Taktík keppinautarins kemur þó Birgi Jónssyni, forstjóra Play, ekki á óvart.
„Við höfum engar áhyggjur af samkeppninni við það ágæta félag. Okkar módel gerir ráð fyrir hefðbundnum svörum frá þeim eins og þau svöruðu WOW og Express – ekkert nýtt í því leikkerfi. Lækka verð á staði sem við erum að fljúga á en halda verðum háum á stöðum sem þau eru ein,“ segir Birgir.
Í því samhengi má nefna að í síðustu viku boðaði Icelandair flug til Salzburg í vetur. Þangað hefur Play líka sett stefnuna en Wow Air fékk lengi að halda úti ferðunum til austurrísku borgarinnar í friði fyrir Icelandair.
Þar með er Play í samkeppni við Icelandair í flugi til allra áfangastaða en reyndar flýgur Icelandair fyrir hönd systurfélagsins Vita til Alicante og Las Palmas á Kanarí.
