Síðar í dag eða strax eftir helgi má búast við að Play birti sínar fyrstu farþegatölur. Þar verða meðal annars upplýsingar um sætanýtingu og fjölda farþega í nýliðnum mánuði.
Þessi upplýsingagjöf mun óvænt veita innsýn í farmiðasölu flugfélagsins. Hún mun nefnilega leiða í ljós hversu margir keyptu flug með félaginu í júlí og ferðuðust í þessum sama mánuði.
Skýringin á því er sú að þann 1. júlí hafði Morgunblaðið það eftir Birgi Jónssyni, forstjóra Play, að búið væri að bóka um helming flugsætanna í mánuðinum.
Vissulega nefndi forstjórinn ekki nákvæma tölu eða hlutfall en ef við gefum okkur að hann hafi námundað innan skynsamlegra marka þá þýðir þetta að 11 til 13 þúsund sæti hafi verið bókuð þann 1. júlí.
Framboðið hjá Play nam nefnilega 24.960 sætum í síðasta mánuði samkvæmt talningu Túrista.
Verði fjöldi farþega í kringum sextán þúsund þá er það vísbending um að alla vega þrjú þúsund farþegar Play í júlí hafi bókað flugið með stuttum fyrirvara.
Á sama hátt kemur það ekki vel út fyrir stjórnendur Play ef farþegahópurinn hefur ekki farið nokkuð yfir þrettán þúsund.
Nú er bara að bíða og sjá hvað kemur upp úr kössunum hjá Play.