Allt frá því í vor hafa bólusettir Bandaríkjamenn verið velkomnir til Evrópu. Á sama tíma hafa bandarísk landamæri verið lokuð fyrir Evrópubúum. Þessu ástandi hefur forstjóri Delta flugfélagsins líkt við einstefnu en þann 8. nóvember verður umferðin í báðar áttir. Og þess sjást merki í flugáætlun Icelandair.
Félagið hefur nefnilega bætt við einni brottför á dag til JFK flugvallar í New York fyrstu vikurnar eftir breytingu. Þessi viðbótarferð verður daglega klukkan 17:05 en hin hefðbundna brottför er dagskrá fimm mínútum fyrr. Auk þess fljúga þotur Icelandair til Newark flugvallar sem einnig er stutt frá Manhattan. Félagið getur þar með flutt ríflega sex hundruð farþega til stórborgarinnar á degi hverjum.
Sala á flugi Icelandair til Orlandó hefur líka greinilega tekið kipp því uppselt er í brottförina þann 8. nóvember og sætin í næstu ferðir á eftir eru mjög dýr.
Spurður um stöðuna þá segir Bogi Nils Bogason, forstjóri Icelandair, að áhrifin af opnun Bandaríkjanna séu svipuð og þegar ferðamenn fengu að heimsækja Kanada á nýjan leik nú í haust. Þá jukust bókanir um leið og fólk gat ferðast þangað á ný segir Bogi en svo hafi eftirspurnin jafnað sig en haldist sterk.
Forstjórinn á þó ekki von á því að Icelandair bæti við áfangastöðum vestanhafs nú í vetur. Í staðinn verði heldur horft til þess að hefja flug fyrr næsta vor. Bogi ítrekar þó að félagið muni sem fyrr aðlaga framboð að eftirspurn.