Í lok júní var komið að jómfrúarferðum tveggja norrænna lággjaldaflugfélaga, Play og Flyr. Félögin tvö eiga því að baki sex mánuði í loftinu og hjá báðum hefur verið á brattan að sækja. Alla vega þegar horft er til fjölda óseldra sæta.
Á því sviði var staðan betri hjá Play en Flyr. Hjá íslenska félaginu var sætanýtingin í fyrra 53 prósent en 47 prósent hjá Flyr. Til samanburðar gerði sú sviðsmynd sem Play kynnti í hlutafjárútboði sínu í júní sl. ráð fyrir 72 prósent nýtingu á þessu fyrsta ári starfseminnar.
Október komst Play næst þessu marki og sá mánuður var líka langbestur hjá norska nýliðanum eins og sjá má hér fyrir neðan. Þá voru seldu sætin flest og farþegarnir sömuleiðis. En allt árið í fyrra nýttu 101 þúsund farþegar sé ferðir Play en Flyr flutti 276 þúsund farþega.
Í flota Play eru þrjár 192 sæta Airbus þotur sem hafa síðustu mánuði flogið til evrópskra áfangastaða á meðan Flyr býður upp á bæði innanlandsflug í Noregi og flug frá Ósló til Evrópu. Félagið er í dag með fimm Boeing 737 þotur með sæti fyrir 189 farþega.
