Meðaltekjur Icelandair af hverjum farþega voru 26 prósentum hærri á síðasta ársfjórðungi í samanburði við sama tíma árð 2018. Þetta sýna útreikningar Túrista sem byggja á uppgjörum félagsins en þar er bæði horft til farþegatekna félagsins og svokallaðra hliðartekna. Til þeirra teljast t.d. tekjur af sölu á farangursheimildum og vali á sætum.
Það er hins vegar ekki hægt, með góðu móti, að gera samanburð við árið 2019. Það ár tekjufærðu nefnilega stjórnendur Icelandair skaðabætur frá Boeing, vegna kyrrsetningar Max þotanna, sem farþegatekjur. Það er því bara hópur starfsmanna Icelandair sem þekkir hversu háar tekjurnar voru í raun árið 2019.
Bjartsýnn á verðþróunina
Icelandair gefur ekki upp þróun meðaltekna á hvern farþega í uppgjörum sínum en á afkomufundi félagsins, síðastliðinn föstudag, spurði Túristi út í þessa verðþróun. Í svari Boga Nils Bogasonar, forstjóra Icelandair, kom fram að hækkunin skrifaðist m.a. á betri sölu á Saga Class miðum núna í samanburði við árið 2018 þegar hlutfall Economy Light miða var hærra. Bogi benti jafnframt á að það væru margir hlutir sem hefðu áhrif á þessar stærðir en hann væri bjartsýnn á verðþróunina í ár, m.a. vegna undirliggjandi eftirspurnar eftir ferðalögum.
Hann ítrekaði jafnframt að ætlunin væri að gera rekstur Icelandair arðbæran á ný og það þýddi að félagið myndi ekki selja mikið af flugmiðum undir kostnaðarverði.
Í því samhengi má rifja upp að Icelandair skilaði neikvæðri afkomu árið 2018 sem stjórnendur félagsins röktu meðal annars til „ósjálfbærra fargjalda“ á markaðnum. Afkomuspá þeirra fyrir árið 2018, sem gefin var út í febrúar sama ár, gerði þó ráð fyrir vænum hagnaði.
Vægi fraktflutninga margfaldast
Sem fyrr segir þá upplýsir Icelandair ekki sérstaklega um þróun meðaltekna á hvern farþega í uppgjörum sínum en veitir í staðinn sýn á einingatekjur og einingakostnað. Báðar þessar stærðir fóru upp á við á síðasta fjórðungi í samanburði við þriðja ársfjórðung í fyrra. Það ber þó að hafa í huga að Icelandair reiknar tekjur af fraktflutningum inn í einingatekjurnar en vægi þeirra hefur aukist umtalsvert í heimsfaraldrinum. Á síðasta fjórðungi síðasta árs námu tekjur af vöruflutningum um 15 prósent af heildartekjum félagsins sem er þrefalt hærra hlutfall en allt árið 2018.
Ef frakttekjurnar eru teknar út úr myndinni og aðeins horft til farþegtekna þá hækkuðu einingatekjurnar um 11 prósent á síðasta fjórðungi síðasta árs í samanburði við sama tíma árið 2018. Sem fyrr er ekki hægt að gera samanburð við 2019 vegna skaðabótanna frá Boeing sem færðar voru sem farþegatekjur.