Innrás Rússa í Úkraínu hófst að morgni 24. febrúar og um leið dró verulega úr bókunum á flugi til og frá löndunum í kringum átakasvæðið. Samdrátturinn í flestum ríkjum Austur-Evrópu nam 30 til 50 prósentum fyrstu viku stríðsins í samanburði við vikuna á undan.
Á hinum Norðurlöndunum og í Mið- og Suður-Evrópu fækkaði bókunum á bilinu tíu til þrjátíu prósent samkvæmt nýrri úttekt greiningafyrirtækisins ForwardKeys
Ísland, Belgía og Serbía voru aftur á móti þau þrjú lönd þar sem samdrátturinn í bókunum mældist undir tíund í fyrstu viku stríðsátakanna. Að mati sérfræðinga ForwardKeys þá er skýringin á litlum samdrætti í Serbíu, þrátt fyrir legu landsins, sú að fyrstu daga stríðsins var flugumferðin milli Serbíu og Rússlands óvenju mikil.
Atlantshafsmarkaðurinn hélt sér betur
Bæði Icelandair og Play gera út á farþega á leið milli Evrópu og Norður-Ameríku og samkvæmt tölum ForwardKey þá dró minna úr bókunum á þeim markaði en þegar kemur að flugi innan Evrópu. Á þeim síðarnefnda fækkaði pöntunum um 23 prósent dagana 23. febrúar til 2. mars en samdrátturinn í flugmiðabókunum milli Bandaríkjanna og Evrópu var þrettán prósent.
Áhrifin eftir að aukast
Að mati Olivier Ponti, framkvæmdastjóra greininga hjá ForwardKeys, er þetta til marks um að Bandaríkjamenn tengi ekki stríðið í Úkraínu við alla Evrópu. Þeir horfi því ennþá til álfunnar sem frekar öruggs áfangastaðar segir Ponti. Hann ítrekar þó tölurnar hér að ofan nái aðeins til fyrstu viku stríðsins og áhrif þess á ferðalög eigi líklega eftir að aukast.
