Snemma árs 2008 hafði olíuverð hækkað um sextíu og fimm prósent á einu ári. Stjórnendur flugfélaga reyndu þá að mæta stórauknum kostnaði við kaup á eldsneyti með hærri fargjöldum og minni umsvifum.
Verðið fór áfram upp á við og þegar sumarvertíðin hófst kostaði fat af Norðursjávarolíu að jafnaði rúmlega 130 dollara. Það er álíka hátt verð og í byrjun þessa mánaðar en síðustu daga hefur verðið sveiflast á milli 98 og 112 dollara.
Sérfræðingar sjá fá teikn um verðlækkanir og sérstaklega á meðan stríð geysar í Úkraínu og rússnesk olía er bannvara. Ný spá stórbankans Morgan Stanley gerir til að mynda ráð fyrir ennþá hærra olíuverði í sumar þegar eftirspurn eykst. Flugfélögin gætu því að þurft að hækka farmiðaverðið ennþá meira enda er fjárhagur þeirra flestra veikburða eftir heimfaraldurinn.
Staðan í dag minnir því nokkuð á fyrri hluta árs 2008 og af þeim sökum er áhugavert að skoða hvernig ferðamannasumarið það ár þróaðist.
Og í stuttu máli sagt þá rættist vel úr sumrinu. Alla vega þegar horft er til fjölda ferðamanna. Hingað komu 221 þúsund túristar eða um tveimur prósentum fleiri en sumarið 2007. Þetta þætti þó ekki gott í dag því ferðamannahópurinn var þrefalt fjölmennari sumarið 2019.
Veiking krónunnar vann með ferðaþjónustunni sumarið 2008 því útlendingar fengu meira fyrir peninginn en árin á undan.
Lægra gengi krónunnar kom þó ekki í veg fyrir töluverða niðursveilfu í komum bandaríska ferðamanna. Þeim fækkaði nefnilega um fjórðung frá sumarinu 2007 eins og sjá má á töflunni hér fyrir neðan.
Á þessum tíma var vægi Bandaríkjamanna í ferðamannahópnum nokkru minna en síðar varð. Þjóðverjar og Bretar voru til að mydna fjölmennari og því var niðursveiflan í komum bandarískra túrista ekki eins þungt högg og það yrði núna.
Eins og sjá má á töflunni þá fækkaði Kínverjum hlutfallslega langmest sumarið 2008 og eins var fækkunin þónokkur í hópi Breta, Norðmanna og Svía.
Af þeim þjóðum sem fjölmenntu hingað í meira mæli árið 2008 má helst nefna Kanadabúa og Pólverja en í því samhengi má nefna að Icelandair sótti með meiri krafti á kanadíska markaðinn þetta sumar.
En þó olíuverðið og þrýstingur á hærri fargjöld sé álíka í dag og hann var fyrir fjórtán árum síðan þá er margt annað gjörbreytt. Núna er heimsbyggðin að komast á ferðina á nýjan leik eftir farsóttina og eftirspurn eftir ferðlögum mikil. Ísland er miklu þekktari áfangastaður í dag og hingað fljúga mun fleiri erlend flugfélög en áður.
Það verður hins vegar ekki horft fram hjá því að nú geysar stríð í Úkraínu og erfitt að ráð í áhrif þess á ferðalög fólks.
