Fyrir heimsfaraldur var nærri útilokað fyrir flugfélög að fá lendingarleyfi á Heathrow flugvelli í London nema borga fyrir þau milljarða króna. Af þeim sökum horfðu stjórnendur bandaríska lágfargjaldaflugfélagsins Jetblue til þess að þotur þeirra myndu lenda á Gatwick flugvelli þegar félagið myndi hefja áætlunarflug til Bretlands.
Svo kom Covid-19 og þá opnuðust óvænt möguleikar fyrir Jetblue á Heatrow og nú býður félagið upp á áætlunarflug frá JFK flugvelli í New York til bæði Heathrow og Gatwick flugvallar í London.
Frá og með komandi sumri bætist svo við tíðar ferðir til bresku flugvallanna tveggja frá Boston. Frá þessu greindi forstjóri bandaríska flugfélagsins fyrr í dag og sagði það hafa gefið góða raun að fljúga til þessara tveggja stærstu flugvalla Bretlands í stað þess að láta annan þeirra duga.
Mun færri sæti en hjá íslensku félögunum
Þó forsvarsfólk Jetblue skilgreini flugfélagið sem lágfargjaldafélag þá gera þau sérstaklega út á viðskiptaferðalanga í flugi sínum yfir Atlantshafið. Í nýjum langdrægum en minni gerðum af Airbus þotum hafa þau nefnilega komið fyrir tuttugu og fjórum einkaklefum á sérstöku viðskiptafarrými. Til viðbótar eru svo 114 hefðbundin sæti.
Lægstu fargjöldin undir Play og Icelandair
Í tilkynningu frá Jetblue segir að ódýrustu farmiðarnir frá Boston til London muni kosta 499 dollara, báðar leðir. Sú upphæð jafngildir nærri 65 þúsund krónum. Hjá Icelandair kosta ódýrustu farmiðarnir (báðar leiðir) frá Boston til annað hvort Gatwick eða Heathrow 816 evrur. Ef flogið er með Play frá Boston til London Stansted kostar farið að minnsta kosti 616 dollara. Það gilda hins vegar ólíkar reglur hjá flugfélögunum varðandi farangur og veitingar um borð.
Tvær íslenskar tengingar
Þess má geta að Icelandair og Jetblue hafa lengi átt í samstarfi sem felur í sér að bæði flugfélögin geta selt og gefið út flugmiða hjá hvort öðru. Þegar kemur að flugi frá milli London til annars vegar Boston og hins vegar New York þá eru félögin aftur á móti í harðri samkeppni.
Samtarf Icelandair og Jetblue er ekki eina íslenska tengingin við Jetblue því í stjórn flugfélagsins situr Ben Baldanza en hann átti í rúm tvö ár sæti í stjórn Wow Air. Hann þekkir því vel hvernig það er að gera út á flug frá austurströnd Bandaríkjanna til Evrópu með stoppi á Keflavíkurflugvelli.
