Erlend greiðslukort voru nýtt til að greiða fyrir vöru og þjónustu hér á landi fyrir rétt rúmlega fjórtán milljarða króna í apríl. Svo mikil var veltan líka að jafnaði í apríl árin 2017 til 2019. Á þessum árum fór um fjórðungur upphæðarinnar í kaup á gistingu eða tæpir 3,4 milljarðar króna að meðaltali.
Núna er hlutfalið komið niður fyrir fimmtung því útlendingar greiddu tæpa 2,8 milljarða kr. í síðastliðnum apríl til hótela og gististaða. Niðursveiflan var ennþá meiri í flokki fyrirtækja sem sérhæfa sig í alls kyns afþreyingu fyrir ferðamenn. Kortaveltan í þessum lið var að meðaltali 2,7 milljarðar kr. í apríl árin 2017 til 2019 en var núna rétt um 1,8 milljarður kr. Minjagripaverslanir fengu líka minna til sín en áður og notkun á hraðbönkum hefur dregist mjög saman eins og sjá má á töflunni.
Erlendar kortagreiðslur til bílaleiga hafa aftur á móti hækkað umtalsvert eða um hálfan milljarð króna á milli þessara tímabila. Aðrir farþegaflutningar og menningarstarfsemi fengu líka meira í sinn hlut eða rúmlega 200 milljónum meira.
Skýringuna á þessu má líklega helsta finna í fjölda erlendra ferðamanna hér á landi í apríl í ár. Þá flugu 103 þúsund útlendingar frá Keflavíkurflugvelli en þeir voru að jafnaði 140 þúsund í apríl árin 2017 til 2019.
Það verður þó að hafa í huga að útlendingar búsettir á Íslandi eru hluti af þessari tölu. Að sama skapi þá flokkast kortanotkun Íslendinga með erlend greiðslukort sem „kortavelta ferðamanna“ í grunni Rannsóknarseturs verslunarinnar. Það eru þó ekki hægt að eigna ferðamönnum öll kaup út á erlend kort hér á landi ekki frekar en við getum sagt að allir útlendingar sem fljúga frá Keflavíkurflugvelli séu ferðamenn.
