Sumarið 2019 jókst vægi erlendra flugfélaga á Keflavíkurflugvelli enda var Wow Air ekki lengur í loftinu. Um leið fór hlutdeild Icelandair upp í 69 prósent eftir að hafa verið rétt um 45 prósent í júní 2018. Næstu tvær sumarvertíðir lituðust svo af heimsfaraldrinum en í nýliðnum júní var ástandið nærri eðlilegt á ný.
Þá stóð Icelandair fyrir 59 af hverjum eitt hundrað áætlunarferðum til og frá Keflavíkurflugvelli. Hlutdeild Play var fjórtán prósent og íslensku félögin því samtals með 73 prósent af umferðinni um flugvöllinn.
Til samanburðar voru Icelandair og Wow Air samanlagt með 77 prósent af ferðunum í júní 2018 en segja má að stjórnendur félaganna hafi farið fram af meira kappi en forsjá það sumar. Þegar leið á vertíðina sagði forstjóri Icelandair starfi sínu lausu og Wow Air lagði spilin á borðið í dýrkeyptri skuldabréfaútgáfu.
Þessa dagana er vægi íslenskra flugfélaga á Keflavíkurflugvelli aðeins lægra sem fyrr en gæti nálgast áttatíu prósentin á ný næsta sumar miðað við stækkunaráform Play. Eins á Icelandair nokkuð í að ná fyrri stærð og því ekki útlit fyrir annað en að íslensk flugfélög verðir áfram með bróðurpartinn af flugsamgöngunum til og frá landinu.
Af erlendu flugfélögunum þá var Wizz Air umsvifamest í Íslandsflugi í júní og var félagið með um sex prósent af áætlunarferðunum frá Keflavíkurflugvelli. Þar á eftir kom Delta með þrjú prósent og svo Easyjet og SAS með um tvö prósent hlutdeild.
