Það voru rúmlega 35 þúsund farþegar sem fóru um Reykjavíkurflugvöll í síðasta mánuði en inni í þeirri tölu eru ekki eingöngu í farþegar í innanlandsflugi heldur líka þeir sem koma hingað á einkaþotu eða fara í þyrluflug frá höfuðborginni.
Farþegarnir í Vatnsmýrinni voru vissulega fleiri en í júlí í fyrra en allt að fjórðungi færri en á sama tíma á árunum fyrir heimsfaraldurinn. Hluti af þessari niðursveiflu skrifast á flutning Færeyjaflugs til Keflavíkur.
Á Akureyrarflugvelli er farþegahópurinn aftur á móti mun fjölmennari í dag en hann var því í síðasta mánuði flugu 18 þúsund farþegar til og frá höfuðstað Norðurlands. Það er um helmingur af fjöldanum í Reykjavík og ekki hefur áður munað eins litlu á þessum tveimur stærstu innanlandsflugvöllum landsins í júlímánuði eins og sjá má hér fyrir neðan. Alla vega þegar horft er tíu ár aftur í tímann.
Uppsveiflan fyrir norðan skrifast helst á aukið millilandaflug því þota Niceair flýgur núna reglulega til bæði Kaupmannahafnar og Tenerife og alla mánudaga er í boði beint flug til Rotterdam í Hollandi frá höfuðstað Norðurlands.
