Tveir af fimm stjórnarmönnum Icelandair hafa unnið að því síðustu misseri að koma á laggirnar flugfélagi sem sinna á áætlunarflugi frá Toronto í Kanada til bandarísku borganna Boston og Chicago. Flugfélagið heitið Connect Airlines og ætlunin var að hefja rekstur í fyrra. Ennþá er miðasala ekki hafin.
Félagið er í eigu John Thomas en hann tók sæti í stjórn Icelandair Group í ársbyrjun 2020 ásamt Ninu Jonsson en hún hefur verið Thomas innan handar við stofnun nýja flugfélagsins.
Í flugflota Connect Airlines verða Dash 8 flugvélar líkt og Icelandair notar í innanlandsflugi og í ferðum til Grænlands. Það hefur hins vegar reynst Thomas erfitt að fá flugmenn til starfa og af þeim sökum hefur Connect Airlines ráðist í átak þar sem flugmönnum eru tryggð árslaun upp á 250 þúsund dollara. Sú upphæð jafngildir um 36 milljónum króna á gengi dagsins eða þremur milljónum kr. á mánuði.
Í tilkynningu Connect Airlines er haft eftir Thomas að tilboðið sé í raun fordæmalaust en sé liður í því að koma félaginu af stað. „Að stofna nýtt flugfélag við þessar krefjandi markaðsaðstæður kallar á að við gerum hlutina öðruvísi en aðrir,” segir Thomas í tilkynningu.
Aðeins þrjátíu flugmönnum verða boðin þessi sérkjör og staðfestir talsmaður félagsins, í svari til Túrista, að orlof og framlag í eftirlaunasjóð sé hluti af 36 milljóna ársgreiðslunni. Til samanburðar má geta að tekjuhæsti flugmaður landsins var með nærri 46 milljónir í tekjur í fyrra samkvæmt úttekt Frjálsrar verslunar.
Sem fyrr segir ætlar Connect Airlines að nota sömu tegund af flugvélum og Icelandair og flugmenn þess félags ættu því að geta sótt um starf vestanhafs. Það gæti þó orðið snúið að fá atvinnuleyfi í Bandaríkjunum.
