Ellefu þeim átján þotum Icelandair sem lentu á Keflavíkurflugvelli í morgunsárið voru af gerðinni Boeing Max 8. Í þeim eru 160 sæti en í gömlu Boeing 757 þotunum, sem voru uppistaðan í flota félagsins, eru sætin 184. Það komast því 15 prósent fleiri farþegar í gömlu vélarnar en þær nýju sem skýrir meðal annars hærri sætanýtingu hjá Icelandair nú en áður.
Í nýliðnum ágúst var nýtingin 89 prósent en 83 prósent á sama tíma árið 2019. Nýtingin var aftur á móti 88 prósent í ágúst 2017 en það ár skilaði Icelandair síðast hagnaði. Þá nýttu 568 þúsund farþegar sér ferðir Icelandair en núna voru þeir 514 þúsund. Í samanburði við sama tíma í fyrra er batinn mikill því farþegahópurinn var tvöfalt fjölmennari að þessu sinni.
Hlutfall tengifarþega hækkaði í nýliðnum ágúst frá því sem var í júlí eða úr 43 prósentum í 45 prósent. Vægi þessa hóps, sem aðeins millilendir á Keflavíkurflugvelli, var 58 prósent á þriðja ársfjórðungi árið 2017. Á þeim tíma gaf Icelandair ekki upp hvernig skiptingin var milli farþegahópi í hverjum mánuði heldur aðeins ársfjórðungslega. Úr þessar upplýsingagjöf var bætt sumarið 2019 eftir fall Wow Air.
„Sumarið hefur gengið vel hjá Icelandair og í heild hefur félagið flutt um 1,4 milljón farþega í júní, júlí og ágúst, álíka marga og allt árið 2021. Hlutfall tengifarþega er einnig sífellt á uppleið sem er til marks um aukið jafnvægi í leiðakerfinu. Starfsfólk félagsins hefur staðið sig ótrúlega vel í þessari uppbyggingu og veitt framúrskarandi þjónustu, þrátt fyrir fjölda áskorana sem komið hafa upp undanfarna mánuði vegna afleiðinga heimsfaraldursins og innrásar Rússlands í Úkraínu,“ skrifar Bogi Nils Bogason, forstjóri Icelandair, í tilkynningu.
