Enn streymdu erlendir gestir inn og út af Center-hótelinu Miðgarði við Laugaveg þegar blaðamaður Túrista kom til að hitta eigandann og framkvæmdastjórann Kristófer Oliversson, formann FHG, Félags fyrirtækja í hótel- og gistiþjónustu. Þarna var enn ekki sjáanlegt á yfirborðinu að harðvítug vinnudeila standi yfir milli atvinnurekenda og Eflingar, sem er félag hótelþerna og margra starfsmanna sem hótelrekstur reiðir sig á. Það eru aðrir en Centerhotels sem borið hafa hitann hingað til. Fljótlega ræðst hvert framhaldið verður. Kristófer býður upp á kaffi og við setjumst í veitingasalinn.
„Áhrifin af verkfallinu eru geigvænleg fyrir þau hótel sem hafa orðið fyrir þeim. Á hádegi á morgun hafa Íslandshótel í Reykjavík þolað verkfall í þrjár vikur. Fólkið sem þar hefur unnið allan sólarhringinn undanfarnar vikur líður ekki vel. Síðan bættust við Berjaya-hótelin og Edition. Þessi hótel hafa tapað verulegum fjárhæðum vegna lokana. Hilton og Natura eru lokuð.
Við hjá Centerhotels erum farin að kenna á óvissunni í bókunum. Menn orða efasemdir þannig: Við fengum þær upplýsingar að hægt væri að halda þessum hótelum opnum. Eigum við að trúa því? Þannig er spurt. Ferðaskrifstofur eru ábyrgar gagnvart sínum viðskiptavinum og vilja geta afbókað með viku fyrirvara.”
Nú hafa deiluaðilar verið boðaðir til fundar þar sem ræða á hugsanlega miðlunartillögu og verkbanni hefur verið frestað. Hvernig horfir þetta við þér á þessari stundu?
„Ég vil ekki trúa því að verkbanni sé frestað – nema að fyrir kvöldið berist tillkynning um að verkföllum verði jafnframt frestað. Sólveig Anna Jónsdóttir, formaður Eflingar, metur stöðuna þannig að deilan verði ekki leyst við samningaborð. Þá verður hún aðeins leyst með samþykkt miðlunartillögu eða lagasetningu. Ef samþykkt verður miðlunartillaga sem felur í sér viðurkenningu á þessari aðferð – að reka fleyg á milli höfuðborgarinnar og landsbyggðarinnar og skilja hann þar eftir – þá sitjum við hér eftir. Það má ekki gerast.
Ég hef í tvígang á undanförnum árum reynt að ná samtali við formann Eflingar og gert grein fyrir erindinu, sem er þetta: Það eru sameiginlegir hagsmunir okkar að taka á húsnæðismálunum, sem ganga nærri okkar fólki. Við höfum hækkað laun um 112 prósent í evrum talið frá árinu 2014. Það hverfur allt inn í húsnæðismarkaðinn. Þá segi ég: Kæra Sólveig Anna, stoppum Airbnb! Það eru okkar sameiginlegu hagsmunir. Það mun slá mjög á leiguverð á húsnæðismarkaðnum á höfuðborgarsvæðinu. Ég hef ekki náð að eiga þetta samtal við Eflingu en hef rætt þessi mál við ASÍ, VR og Starfsgreinasambandið.”
Þið lifðuð af heimsfaraldurinn og gátuð greitt laun vegna opinberrar aðstoðar og söfnuðuð síðan skuldum til að halda ykkur á floti. Nú hefur ferðaþjónustan hinsvegar tekið vel við sér og bókunarstaðan er góð – en þá getið þið ekki samið við ykkar fólk?
„Fyrir heimsfaraldur hafði þetta fyrirtæki mitt skilaði hagnaði í 11 ár. Á tveimur covid-árum þurrkaðist það allt upp og meira til. Skuldir jukust um tvo til þrjá milljarða króna. Við það erum við að glíma núna – alveg eins og félagsmenn í Eflingu eru að glíma við verðbólguna, hækkandi skuldir og húsnæðiskostnað. Við erum í sömu málum. En bókunarstaðan lofar góðu. Vonandi verður ekki lengri truflun á starfseminni en þegar er orðin því að nú er hafinn mikilvægasti bókunartíminn fyrir sumarið.”
Samtök atvinnulífsins leggja mikla áherslu á samstöðu atvinnurekenda, það sé verið að gera samninga fyrir alla heildina, en hentar þetta endilega ykkur hótelrekendum?
„Verkfall Eflingar og VR árið 2019 lenti á hótelum og gististöðum. Það gerist aftur núna. Ég kann að meta þennan stuðning Samtaka atvinnulífsins – að þeir vilji setja á verkbann til að stöðva þetta. Það er fórn af hálfu þeirra fyrirtækja sem yrði lokað. En að því sögðu hafa bæði fjármálaráðherra og ferðamálaráðherra sagt að vinnumarkaðsmódelið sé ónýtt. Það hefur sannast í þessu verkfalli og þeim lagaklækjum sem beitt er. Yfir þetta verður að fara og klára það verk fyrir næstu áramót því þá hefst næsti slagur.”
Ertu bjartsýnn á að lausn sé í sjónmáli?
„Það er ekki annað hægt en að leysa þetta núna. Ef deiluaðilar geta ekki náð saman sjálfir verður að koma fram miðlunartillaga, sem annað hvort verður samþykkt eða felld. Í kjölfarið gæti ríkisstjórnin þurft að grípa inn í.”