Níu af hverjum tíu ferðamönnum segja náttúruna vera helstu ástæðuna fyrir ferðalaginu til Íslands og ríflega helmingur fer ofan í „náttúrubað“ í ferðinni. Þetta er meðal þess sem fram kemur í niðurstöðum nýrrar könnunar á ferðalögum útlendinga um Ísland frá maí og fram í desember í fyrra.
Meðalaldur ferðamanna á þessu tímabili var 40 ár og helmingur hópsins segir tekjur sínar vera yfir meðallagi í sínu heimalandi. Níu prósent svarenda segjast vera lágtekjufólk.
Niðurstöður könnunarinnar sýna líka að áfram er bílaleigubíllinn þarfasti þjónn túristans á Íslandi. Sex af hverjum tíu leigja sér bíl hér á landi en aðeins þrír af hverjum 100 ferðamönnum nýttu sér almenningssamgöngur.
Almennt eru útlendingarnir ánægðir með dvöl sína á landinu því 68 prósent þeirra sögðu ferðina hafa farið fram úr væntingum og 49 prósent telja hana hafa verið peninginna virði.
Í heildina flugu um 1,7 milljón erlendra ferðamanna frá Keflavíkurflugvelli en sú talning hefur lengi verið notuð til að leggja mat á fjölda ferðamanna hér á landi. Langflestir voru bandarískir og þó framboð á Íslandsflugi sé mest frá austurströnd Bandaríkjanna þá kemur fólkið víða að. Hátt flutfall bandarísku túristanna hér á landi á til að mynda heima í vestur- og suðurhluta Bandaríkjanna.
Bresku og þýsku ferðamennirnir koma líka alls staðar að en þeir frönsku búa flestir nálægt þeim flugvöllum sem hægt er að komast beint frá til Keflavíkurflugvallar. Framboð á Íslandsflugi frá Frakklandi hefur nærri einskorðast við París en svo er líka þónokkuð um ferðir frá Genfarflugvelli sem er á landamærum Sviss og Frakklands. Tilraunir Icelandair til að halda úti áætlunarflugi frá Nice gæti lokkað hingað fleiri Frakka sem búa við Miðjarðarhafið.
Þau sem ferðuðust til Íslands frá maí til desember í fyrra stoppuðu að jafnaði í 7,6 nætur og flestir gista á höfuðborgarsvæðinu og á Suðurlandi. Aftur á móti gefur fólk sér styttri tíma í Vestur- og Austurland því þar er dvalartíminn innan við tvær nætur eins og sjá má hér fyrir neðan.
