Xiaomi er hraðvaxta hátæknifyrirtæki í Beijing í Kína, stofnað fyrir 14 árum af frumkvöðlinum og milljarðamæringnum Lei Jun og félögum hans. Á síðasta ári var fyrirtækið í þriðja sæti á lista þeirra sem seldu flesta farsímana – næst á eftir Samsung og Apple. Xiaomi framleiðir og selur margskonar annan háþróaðan tæknibúnað og neytendavörur en samdráttur á farsímamarkaði heimsins leiðir fyrirtæki út á lendur orkuskipta í samgöngum. Fyrsta farartækið sem lítur dagsins ljós hjá Lei Jun og félögum er Xiaomi SU7.
Lei Jun var í 20. sæti yfir ríkustu Kínverjana 2023 og í 190. sæti yfir þá ríkustu í heimi – MYND: X – Lei Jun
Fyrir þremur árum greindi Xiaomi frá því að fyrirtækið hefði fjárfest í rafbílaframleiðslu fyrir 10 milljarða dollara og undir lok síðasta árs var hulunni svo svipt af Xiaomi SU7. Um leið lýsti Lei Jun þeim áformum sínum að gera Xiaomi að fimmta stærsta bílaframleiðanda í heimi.
Nú í vikunni skýrist hvað SU7 mun kosta, bíllinn sem Lei Jun lýsir sem þeim „fallegasta, liprasta og tæknilegasta“ sem kostar innan við 70 þúsund dollara (9,3 milljónir íslenskra króna), og nú verður byrjað að taka á móti pöntunum. Lei Jun segir Xiaomi búa yfir tækni sem skilað geti betri vinnslu en Tesla og Porsche.
Xiaomi SU7 í sýningarsal – MYND: Wikipedia
Fréttir og myndir hafa birst af áhugasömu fólki þyrpast í 76 sýningarsali Xiaomi í 29 borgum í Kína til að dást að hafbláum SU7 með sínar bogadregnu línur sem minnka eiga viðnám. Hönnun hefur verið helsti styrkur Xiaomi. Nú er sjá hvernig tekist hefur til með fyrsta rafbíl fyrirtækisins, sem framleiddur verður í tveimur útgáfum, með að sögn 668 og allt að 800 km drægni. Verksmiðjan í Beijing getur framleitt um 200 þúsund bíla á ári.
