Þýski bílaframleiðandinn Mercedes-Benz hefur greint frá því að rafbílnum Vision EQXX hafi á dögunum verið ekið rúmlega 1.000 kílómetra leið frá Riyadh til Dúbæ á einni hleðslu. Meðaleyðslan var 7.4 kílóvattstundir á 100 km. leið. Þetta samsvarar því að bensínbíll eyddi um 0.9 lítrum á 100 km. Ökuleið Vision EQXX lá að sögn framleiðandans um arabísku eyðimörkina og í gegnum fjölfarin hverfi. Lofthiti var allt að 34 gráður.
Markus Schäfer, yfirmaður tæknimála og fulltrúi í framkvæmdastjórn Mercedes-Benz, segir í tilkynningu frá fyrirtækinu að með þessari góða orkunýtingu Vision EQXX, 7.4 kílóvattstundir/100km., hafi fengist mikilvægar upplýsingar sem nýtist við frekari þróun raftækni í bílum. Öll kerfi hafi virkað sem skyldi þrátt fyrir hita og eyðimerkursand.
„Enn einn vitnisburðurinn um það að rafbílaakstur er sniðinn fyrir allan heiminn,“ segir Schäfer.
Akstursleiðin, tíminn og eyðslan – MYND: Mercedes-Benz
Í þessum tilraunaakstri Vision EQXX á Arabíuskaganum lá leiðin frá Ryadh í Sádi-Arabíu um 1.010 km leið til Dúbæ í Sameinuðu arabísku furstadæmunum. Aksturinn tók 14 klukkustundir og 42 mínútur. Haldið var frá Ryadh með fulla hleðslu kl. 4.15 árdegis og þegar bíllinn kom til Dúbæ 19.57 síðdegis var enn 309 km. hleðsla á bílnum. Meðal þess sem verið var að kanna var virkni sólarrafhlaðna á þaki bílsins en orka frá þeim er nýtt til að knýja loftkælingu og annan búnað við þessar erfiðu aðstæður undir brennheitri eyðimerkursólinni.
Komið til Dúbæ að kvöldi – MYND: Mercedes-Benz
Það hefur tvisvar áður tekist að aka Vision ECXX yfir 1.000 km leið á einni hleðslu: Frá Þýskalandi yfir Alpana, um Ítalíu að Miðjarðarhafsströnd Frakklands – og einnig frá Stuttgart til Silverstone á Englandi. Nú átti að reyna að getu þessa raflúxusbíls Mercedes-Benz í miklum hita og eru fulltrúar framleiðandans ánægðir.
Forvitnilegt væri að sjá hvernig þessi bíll sem kynntur var til sögunnar 2022 stæði sig í veðri eins og nú er á Íslandi.