Lufthansa hefur náð samkomulagi við verkalýðsfélagið Verdi og þar með er endi bundinn á langa vinnudeilu við flugvallarstarfsfólk þýska flugfélagsins. Flugáætlun Lufthansa fer því ekki úr skorðum yfir páskana líkt og útlit var fyrir en félagið er með þrjár flugferðir til Íslands á áætlun sinni yfir hátíðarnar.
Hinn nýi samningur Verdi og Lufthansa kemur í kjölfar endurtekinna verkfalla undanfarna mánuði sem urðu til þess að aflýsa þurfti fjölda flugferða. Kjaraviðræður höfðu engu skilað en viðsemjendur samþykktu einskonar sáttatillögu í gær. Ekki hefur komið fram í hverju hún fólst en Verdi hafði krafist 12,5 prósenta launahækkunar fyrir þá 25 þúsund starfsmenn Lufthansa sem vinna á jörðu niðri.
Lufthansa á ennþá eftir að ná nýjum samningi við áhafnir og frekari verkföll hjá félaginu eru því ekki útilokuð þegar líður á árið.
Lufthansa Group rekur ekki eingöngu samnefnt flugfélag því flugfélög eins og Austrian, Eurowings og Swiss heyra einnig undir samsteypuna. Tvö þau fyrrnefndu fljúga hingað til lands og dótturfélagi Swiss, Edelweiss, gerir það líka. Það félag heldur úti ferðum til bæði Akureyrar og Keflavíkurflugvallar.