Sjóðir flugfélaga hefðu líklega tæmst fljótlega eftir að heimsfaraldurinn hófst ef allir farþegar hefðu farið fram á fulla endurgreiðslu vegna þeirra ferða sem felldar voru niður vegna ástandsins. Af þeim sökum buðu flugfélög viðskiptavinum sínum inneignarnótur í stað endurgreiðslu og þann kost hafa margir þegið.
Það á líka við um farþega Icelandair því um síðustu mánaðamót hafði félagið gefið út inneignarnótur fyrir samtals 11,8 milljarða króna (84,1 milljón dollara). Upphæðin nam 9,1 milljarði króna um mitt þetta ár og hækkunin síðustu þrjá mánuði nemur því 2,7 milljörðum króna.
Þessi tæplega tólf milljarða kr. skuldbindin nemur því um helmingi af þeim 23 milljörðum króna sem Icelandair Group fékk inn í hlutafjárútboðinu í síðasta mánuði.
Icelandair er þó ekki eina flugfélagið sem verður næstu ár verður að bera kostnaðinn af því að fljúga fjölda fólks milli landa án þess þó að nokkrar nýjar tekjur fáist í staðinn. Þetta vandamál var til að mynda tekið fyrir á vettvangi IATA, alþjóðasamtaka flugfélaga, síðastliðið sumar.
Síðan þá hefur skuld flugfélaga við farþega sennilega aukist hjá mun fleiri flugfélögum en bara hjá Icelandair.
