Bandaríska flugfélagið United Airlines hélt úti Íslandsflugi frá bæði New York og Chicago síðastliðið sumar og var þetta í fyrsta sinn sem þotur félagsins flugu hingað frá síðarnefndu borginni.
Næsta sumar stefnir félagið að halda uppteknum hætti en sem fyrr verður framboð meira frá New York.
Fyrsta ferð vertíðarinnar frá Newark flugvelli til Íslands er nefnilega á dagskrá þann 6. maí en tuttugu dögum síðar hefst Íslandsflugið frá Chicago. Síðasta ferðin þaðan til Íslands verður farin í lok september á meðan ferðunum milli Keflavíkurflugvallar og New York verður haldið úti fram í lok október.
Áætlunin gerir ráð fyrir daglegum ferðum frá borgunum tveimur. Samtals munu þotur United því fljúga 608 ferðir milli Íslands og Bandaríkjanna frá vori og fram á haust á næsta ári.
Samkvæmt upplýsingum frá United þá er ætlunin að Boeing 757-200 þotur verði sem fyrr notaðar í útgerðina á Keflavíkurflugvelli en í þeim eru sæti fyrir allt að 160 farþegar. Það verða því sæti fyrir nærri fimmtíu þúsund farþega í Íslandsflugi United frá New York og Chicago.
