Samfélagsmiðlar

Ferðaminningar Guðrúnar Helgadóttur

Ferðataska sem hleypti lífi í fundarhöld á Gotlandi og fjölskylduferð í franska myllu er meðal þess sem Guðrún Helgadóttir rithöfundur og fyrrverandi forseti Alþingis minnist úr utanlandsferðum sínum.

Fyrsta ferðalagið til útlanda:
Ég var orðin liðlega tvítug þegar ég fór mína fyrstu ferð til útlanda. Það finnst víðförulum smábörnum í fjölskyldu minni hreint ótrúlegt eins og svo margt sem gerðist í „gamla daga“. En ég var eiginlega send til Edinborgar í Skotlandi þar sem bróðir minn og kona hans voru í námi og hafði nýlega fæðst dóttir. Um sama leyti veiktist mamman svo að allir höfðu miklar áhyggjur heima. Námslán voru engin og fjármálin því erfið og eina sambandið sem fólk hafði milli landa voru sendibréf sem voru viku á leiðinni. Ég var því send með vistir og varning. Ég var skelfingin uppmáluð alla leið vegna flughræðslu og angistar yfir örlögum litla stráksins míns sem ég skildi eftir heima ef eitthvað kæmi fyrir mig, svo að ég var varla sérlega skemmtilegur gestur. En allt fór þetta vel og seinna bjó ég sjálf í tvö ár í þessari yndislegu borg og leið þá snöggtum betur.

Best heppnaða utanlandsferðin:

Skemmtilegasta utanlandsferð mín er tvímælalaust afmælisferð árið 2005, en þá leigðum við, börn mín og fjölskyldur þeirra, gamla hnetumyllu í Commissey í Búrgundarhéraðinu í Frakklandi. Við vorum þá tuttugu talsins, en síðan hafa þrjú lítil líf bæst við. Þarna áttum við átta ógleymanlega daga, og erum við ævinlega þakklát fólkinu sem leigði okkur og eru raunar íslensk. Ég vona að þau eigi þennan stað ennþá. Börnin sem fæddust eftir ferðina góðu eru verulega leið yfir að hafa ekki farið með þegar myndirnar úr ferðinni eru skoðaðar.

Verst heppnaða utanlandsferðin:
Versta utanlandsferðin mín var fundarferð til Visby á Gotlandi. Þegar ég beið eftir töskunni minni í flugstöðinni var mér borinn risastór plastpoki, útataður í hvítri málningu, og mér tjáð að inni í þessum ósköpum væri taskan mín. Hún þyrfti að fara í kemtvätt sögðu Svíarnir. Vildi ég ekki gera svo vel að fylla út eyðublað með umsókn þar um. En nú var dönskum kollegum mínum nóg boðið og aldagamall pirringur út í nágrannaþjóðina braust út. Málið endaði með því að íslenska sendiráðið í Stokkhólmi var kallað til og birtist með flottustu ferðatösku sem ég hef nokkurn tíma eignast og helstu nauðsynjavöru og það var ekki talað meira um þurrhreinsunina. Þetta hleypti reyndar fjöri í annars heldur leiðinlegan fund.

Besta máltíðin í útlöndum:
Besti matur sem ég hef borðað í útlöndum var nýr aspargus í smjörsósu í boði sem norski þingforsetinn og góður vinur minn Jo Benkow hélt mér í veitingastað uppi á Holmenkollen eitt ægifagurt ágústkvöld. Maturinn og fegurðin runnu saman í eitt þetta kvöld.
Flestar mínar fjölmörgu utanlandsferðir hafa verið vinnuferðir vegna þingstarfa í nærfellt tuttugu ár, flestar skemmtilegar og minnistæðar og vegna þeirra hef ég eignast marga góða vini í hópi kollega innlendra sem erlendra,  óháð stjórnmálaskoðunum.

Tek alltaf með mér í ferðalagið:
Með mér hefur ævinlega verið bók til að lesa í hótelherberginu og blóm hef ég ævinlega keypt til að hafa þar. Þetta tvennt er mér lífsnauðsyn heima sem erlendis

Draumafríið:
Hvar sem er í Noregi um hásumarið. Hann er fallegasta land í heimi. Og Borgundarhólmur kemur líka til greina. Eftir árin mín öll í Norðurlandaráði er ég auk þess sannfærð um að Norðurlöndin séu sá hluti hnattarins sem hýsir fólk er nálgast það að teljast siðmenntað. Og það er frekar notalegt.

Nýtt efni

Vaxandi óánægju gætir meðal leigusala og húsnæðismiðlara í Bandaríkjunum með það ægivald sem Airbnb hefur á skammtímaleigumarkaðnum. Margir eru sagðir leita leiða til að afla leigutekna utan eða meðfram kerfi bandaríska risans, sem gerir stöðugt meiri kröfur til þeirra sem leigja út vegna þrýstings frá samfélögum sem stynja undan umfangi og markaðsáhrifum skammtímaleigu til ferðafólks.  …

Flugsamstæðan Air France KLM hefur greint frá því að rekstrarhagnaður á síðasta ársfjórðungi hafi minnkað um 30% og er það verri afkoma en flugmálasérfræðingar bjuggust við. Helstu skýringar eru sagðar aukinn starfskostnaður og hærra olíuverð en búist var við. Þetta er veruleiki sem önnur flugfélög hafa almennt verið að kljást við. Á öðrum ársfjórðungi nam …

Þegar stjórnendur Play kynntu í apríl sl. uppgjör fyrirtækisins fyrir fyrstu þrjá mánuði ársins þá brugðu þeir út af vananum og birtu engan árshlutareikning. Þar með fengu fjárfestar og greinendur ekki aðgang að uppfærðum efnahagsreikningi fyrir flugfélagið þar sem meðal annars eigna- og skuldastaða kemur fram. Um leið fengust ekki upplýsingar um hvert eiginfjárhlutfall félagsins …

Suður-kóreski rafhlöðuframleiðandinn LG Energy Solution (LGES) á í viðræðum við þrjá ónefnda kínverska birgja um að framleiða ódýrar bílarafhlöður fyrir Evrópumarkað og bregðast þannig við hærri verndartollum Evrópusambandsins á rafbíla frá Kína.  Þetta hefur Reuters-fréttastofan eftir háttsettum heimildarmanni innan LGES, sem er í hópi stærstu rafhlöðuframleiðenda heims ásamt CATL í Kína, Panasonic í Japan og …

Þó margir njóti guðaveiga í sumarfríinu þá er hásumarið rólegur tími í heimi vínviðskipta. Það er löngu búið að ganga frá sölu á framleiðslu liðins árs en beðið tíðinda af næstu vínuppskeru. Þegar horft er á heildina þá hefur dregið úr vínsölu vegna efnahagsþrenginga og breyttra neysluhátta. En loftslagsbreytingar valda vínbændum víða erfiðleikum og hafa …

Það kemur skýrt fram í afkomutölum rafbílaframleiðandans Tesla að hægt hefur á orkuskiptum í bílasamgöngum. Á fyrri helmingi ársins hefur Tesla selt um 831 þúsund rafbíla en Elon Musk hafði spáð því að á árinu öllu myndu seljast um 1,8 milljónir bíla. Það vantar því enn mikið upp á að sú spá rætist. Sala Tesla …

Áður en Play fór í loftið sumarið 2021 var efnt til hlutafjárútboðs þar sem söfnuðust 10 milljarðar króna. Umsjón með útboðinu höfðu Arctica Finance og Arion banki en þessi tvö fjármálafyrirtæki komu einnig að fjármögnun Wow Air á sínum tíma. Í útboði meðal almennings reyndist umframeftirspurnin áttföld. Í kynningarefni sem fylgdi hlutafjárútboðinu var aðeins ein …

„Okkur er ánægja að tilkynna um fjölgun A350-900-véla í utanlandsflugi og A321neo í innanlandsflugi,“ segir Yukio Nakagawa, innkaupastjóri Japan Airlines, í tilkynningu félagsins um samninga við Airbus um kaup á nýjum þotum. „Með því að flýta því að taka í notkun nýjustu og sparneytnustu flugvélarnar viljum við veita viðskiptavinum okkar besta hugsanlegu þjónustu um leið …