Samfélagsmiðlar

Spurningar og svör: Birkir Hólm Guðnason framkvæmdastjóri Icelandair

Það má búast við því að hlutdeild íslenskra farþega Icelandair eigi eftir að lækka áfram á sama tíma og félagið eflir leiðakerfi sitt segir framkvæmdastjóri Icelandair. Túristi lagði nokkrar spurningar fyrir Birki Hólm Guðnason.

birkir holm icelandair

Flugstöð Leifs Eiríkssonar er fullnýtt á mörgum tímum sólarhringsins. Hefði Icelandair getað aukið umsvif sín í ár og á því næsta ef það væru lausir afgreiðslutímar við flugstöðina að morgni og seinnipartinn?
Við kjósum ekki að horfa í baksýnisspegilinn heldur fram á við. Það er mikilvægt að flugvöllurinn vaxi í takt við þau tækifæri sem við sjáum framundan og ekki síður að hann bjóði upp á enn betra þjónustustig en undanfarin ár. Við erum í gríðarlega mikilli samkeppni, ekki einungis við stærstu flugfélög í heimi heldur einnig flugbandalög, og mikilvægt að við bjóðum upp á samkeppnishæfa eða betri þjónustu fyrir tengifarþega á Norður Atlantshafi og fyrir þá sem kjósa að sækja Ísland heim. Icelandair hefur vaxið hratt á undanförnum árum og við höfum ekki litið svo á að Keflavíkurflugvöllur hafi hamlað þeim vexti. Við höfum aukið tíðni og bætt við áfangastöðum, og þar með fjölgað starfsfólki, stækkað flugflota og aukið tækjakost okkar sjálfra mikið á tiltölulega stuttum tíma. Það reynir mjög á innviði fyrirtækis að stækka svona hratt og við höfum viljað stýra þeim vexti vel.

Hlutfall farþega ykkar sem hefja ferðalagið á Íslandi hefur lækkað töluvert síðustu ár. Heldurðu að það eigi eftir að lækka enn frekar á næstu árum?
Já, það má búast við því. Eftir því sem leiðakerfið eflist, aðgangur okkar að stórum mörkuðum eykst og farþegum fjölgar mun hlutfall þeirra sem koma frá heimamarkaðinum á Íslandi lækka. Íslendingar eru jú aðeins 320 þúsund talsins. En Ísland er samt okkar heimahöfn og við munum ávallt leggja mikla áherslu á að bjóða landsmönnum eins góða þjónustu og okkur er unnt. Það er ekki hægt að loka augunum fyrir því að heimamarkaðurinn er lítill og þó að hann sé mikilvægur og hafi verið að taka við sér, þá sjáum við fram á að aðrir markaðir muni vaxa hraðar.

Hvaða áhrif hefur það haft á markaðinn að easyJet, næst stærsta lággjaldaflugfélag Evrópu, er farið að bjóða upp á ríflega hundrað ferðir í mánuði hingað til lands?
Hörð samkeppni er ekkert nýtt fyrir okkur hjá Icelandair. Sem dæmi þá erum við ekki með nema rétt um 1% markaðshlutdeild á Norður Atlantshafi þó að okkar hafi tekist að tvöfalda okkar hlutdeild á undanförnum árum. Samkeppnin hefur líka vaxið mikið til og frá Íslandi á undanförnum árum en tæplega 20 flugfélög munu fljúga til og frá Íslandi næsta sumar. Oft á tíðum eru samkeppnisaðilarnir margfalt stærri en Icelandair og vel þekktir á sínum heimamarkaði, eins og í tilfelli easyJet, og því skiljanlegt að þeir séu í aðstöðu til að stækka markaðinn. Það er augljóst að koma þeirra hefur stækkað markaðinn og fjölgað ferðamönnum til landsins. Það er sömuleiðis eðlileg og fyrirsjáanleg þróun að þegar markaðir stækka eins og Íslandsmarkaðurinn hefur gert þá fjölgi þeim sem sjá í honum tækifæri. Margskonar utanaðkomandi þættir hafa áhrif á flugfélög og oft erfitt að greina hvort áhrif séu jákvæð eða neikvæð. Það á við um samkeppni eins og annað. Hörð samkeppni í alþjóðaflugi er staðreynd, hluti af tilverunni, og mér finnst það alls ekki neikvætt.

Reglulega er talað um Icelandair sem lággjaldaflugfélag í erlendu ferðapressunni. Hver heldurðu að skýringin sé á því og er þetta góð skilgreining á Icelandair
Skilgreiningar á flugfélögum geta verið mjög ruglandi. Við höfum ekki látið þær skilgreiningar trufla okkur og erum trú okkar viðskiptamódeli og höfum lagt áherslu á að bjóða upp samkeppnihæfa þjónustu og verð. Við erum stórt og rótgróið fyrirtæki á Íslandi með mikla sögu, en erlendis erum við lítið flugfélag. Við höfum vakið athygli fyrir að vera snör í snúningum, fljót að taka ákvarðanir og laga okkur að breytilegum kringumstæðum. Stofnendur félagsins voru frumherjar og ævintýramenn. Við höfum aldrei verið ríkisstofnun, eins og svo mörg evrópsk flugfélög. Viðskiptalíf á heimamarkaði hefur aldrei verið undirstaða hjá okkur, eins og hjá hinum stóru í Evrópu, heldur höfum við alltaf lagt mesta áherslu á fólk á leið í frí eða að heimsækja fjölskyldu og vini, þar sem fargjöld eru almennt lægri. Núna er gjarnan talað um okkur sem „hybrid“, þ.e. blöndu af lággjaldafélagi og hefðbundnu félagi. Það á sennilega vel við.

Icelandair er eitt sárafárra flugfélaga sem flýgur milli Evrópu og N-Ameríku þar sem matur er ekki innifalinn á almennu farrými. Hafið þið íhugað að láta mat fylgja með á ný á lengri leiðum?
Þegar fólk ákveður að fljúga frá A – B þá eru margir þættir sem spila þar inn í; ferðatími, verð, afþreying, þægindi, þjónusta, o.s.frv. Við höfum alltaf lagt áherslu á að heildarupplifunin sé góð og að bjóða upp á þjónustu á samkeppnishæfu verði. Við ákváðum á sínum tíma að bjóða upp á betri og fjölbreyttari mat og rukka fyrir hann og þó svo að við séum ekki með áform um að breyta því eins og staðan er í dag þá munum við að sjálfsögðu endurmeta það reglulega eins og annað í okkar starfsemi. Svona atriði eru stöðugt til athugunar hjá okkur. Við gerum jafnt og þétt skoðanakannanir og aðrar rannsóknir meðal viðskiptavina okkar og reynum þannig að átta okkur á því hvað skiptir þá máli og hvar við erum að standa okkur vel og hvar við getum bætt okkur. Það er lykilatriði að upplifun farþegans af flugi með okkur sé jákvæð og hún ræðst af mörgum þáttum eins og ég nefndi, t.d. viðmóti starfsfólks, þægindum, afþreyingu, veitingum og fleiru. Það er stöðugt verið að breyta og þróa alla þessa þætti til þess að koma á móts við þarfir farþeganna og þar á meðal er maturinn auðvitað.

Í gær birtust svör Skúla Mogensen, forstjóra WOW air við spurningum Túrista.

Nýtt efni

Borgaryfirvöld í Lissabon hafa samþykkt að hækka gistináttagjald úr 2 í 4 evrur. Gjaldtaka nær ekki til tjaldstæða. Þá hefur komugjald á skipafarþega verið hækkað úr 1 í 2 evrur. Tillaga um að hækka það gjald í 4 evrur var felld.  Lusa-fréttastofan hefur eftir Carlos Moedas, borgarstjóra, að það sé „sanngjarnt fyrir borgina og íbúa …

MYND: ÓJ

Kínverskir ferðamenn hafa verið töluvert áberandi í Reykjavík og víðar um land í vor. Auðvitað er fólk af kínverskum uppruna búsett um allan heim og eitthvað af því fer í Íslandsferðir en þeim hefur snarfjölgað sem koma hingað alla leið frá Alþýðulýðveldinu Kína. Samkvæmt talningu Ferðamálastofu á Keflavíkurflugvelli komu hingað í marsmánuði 8.642 Kínverjar og …

Brasilíski flugframleiðandinn Embraer greinir frá góðum gangi í pöntunum og afhendingu véla á fyrstu mánuðum ársins. Mestur var fögnuðurinn í höfuðstöðvunum í São José dos Campos þegar American Airlines staðfesti kaup á 90 farþegaþotum af gerðinni E175, sem verða notaðar í innanlandsflugi og eru hluti af stórri endurnýjun flugflota félagsins. E175 eru meðaldrægar vélar, oftast …

Faxaflóahafnir héldu vorfund sinn fyrir helgi til að kynna fyrirtækjum í ferðaþjónustu skipulag sumarsins við móttöku skemmtiferðaskipa, sem tekur mið af því raski sem verður vegna byggingar farþegamiðstöðvar Faxaflóahafna. Þeim framkvæmdum á að ljúka að tveimur árum liðnum, eins og FF7 greindi nýverið frá. Fram kom á fundinum að gert er ráð fyrir rúmlega 308 …

Fréttaveitan Bloomberg sagði frá því á dögunum að mikil úlfúð ríkti í alþjóðlegu kolefnisvottunarsamtökunum Science Based Targets initiatives, eða SBTi.  Fyrirtæki um allar koppagrundir hafa lengi reitt sig á vottanir frá SBTi þegar þau hafa fullyrt að þau stefni að kolefnishlutleysi.  Yfirleitt er kannski lítil ástæða til þess að fólk kippi sér upp við slæman starfsanda og …

Þegar lent er á flugvelli á ESB-svæðinu bíður farþeganna ekki verslun með tollfrjálsan varning við töskubeltin. Þess háttar er aðeins í boði fyrir brottför. Í Evrópuríkjum utan ESB gefst hins vegar tækifæri til að kaupa ódýrara áfengi við komuna eins og við þekkjum frá Keflavíkurflugvelli. Þeir sem nýta tollinn sinn þar til að kaupa léttvín …

Þrjár þotur Loftleiða munu næstu misseri fljúga viðskiptavinum erlendra ferðaskrifstofa hringinn í kringum heiminn. Um borð eru sætin stærri og færri en í hefðbundnu áætlunarflugi enda kostar ferðalagið skildinginn. Hver farþegi borgar 25 milljónir fyrir ferðalag líkt og farið var yfir í fréttum Stöðvar 2.  Það er ekkert nýtt að Icelandair leigi þotu og áhöfn í …