Hér eru þeir íslensku gististaðir sem eru efst á blaði hjá notendum einnar vinsælustu ferðasíðu í heimi. Hótelstjórar eru sammála um mikilvægi einkunnagjafa notenda Tripadvisor. Á vefnum er að finna tugi þúsunda ummæla um íslenska gististaði.
Því er oft haldið fram að góðir dómar á Tripadvisor geti komið hótelum á toppinn á meðan slæmar umsagnir geti gert út af við gististaði. Og líklega hafa hótelstjörnurnar mun minna vægi í huga stórs hóps túrista en meðaleinkunnin á Tripadvisor.
Á þessum geysivinsæla ferðavef er að finna ríflega 67 þúsund umsagnir um íslensk hótel en sjö af þeim tíu sem hafa fengið hæstu einkunn eru á höfuðborgarsvæðinu.
Mikil hvatning
Efst á blaði er Black Pearl og hótelstjórinn á þessum nýlega gististað við Tryggvagötuna í Reykjavík er ánægður með toppsætið. „Að vera í fyrsta sæti yfir hótel á Íslandi er mikill heiður enda er Tripadvisor hinn fullkomni mælikvarði á ánægju gestanna. Þjónusta við viðskiptavini er vafalaust mikilvægasta stoðin í rekstri Black Pearl og starfsfólk okkar gerir allt til að gera dvölina að þeirri eftirminnilegustu í lífi gestanna. Við erum mjög þakklát fyrir þessa jákvæðu umsögn og dómarnir á Tripadvisor eru okkur hvatning á hverjum degi,“ segir Joost Haandikman, hótelstjóri Black Pearl.
Íbúðir á toppnum
Black Pearl er ekki hefðbundið hótel því þar eru leigðar út íbúðir og eru þær minnstu tæpir áttatíu fermetrar. Í næstu sætum á eftir Black Pearl á Íslandslista Tripadvisor eru tvö önnur íbúðahótel en í því fjórða er Alda Hotel við Laugaveginn. Snorri Thors, hótelstjóri Alda Hotel segir að það sé mikilvægt að vera ofarlega á lista hjá Tripadvisor en einnig hjá hótelbókunarsíðum. „Þeir sem ferðast til landsins skoða í auknum mæli umfjallanir um gististaði og afþreyingu á netinu og velja sér hótel eftir því. Þeir gestir sem gista hjá okkur á vegum t.d Booking.com og Expedia geta gefið okkur einkunn þegar þau hafa gist hjá okkur og þar skorum við einnig hátt.“
Bestu íslensku hótelin samkvæmt einkunnum notenda Tripadvisor:
- Black Pearl, Reykjavík
- Reykjavik Residence Hotel
- Reykjavik4you Apartments
- Alda Hotel, Reykjavik
- Hotel Berg, Reykjanes
- Fosshótel Austfjörðum, Fáskrúðsfirði
- Kvosin Downtown Hotel, Reykjavík
- Castle House Luxury Apartments, Reykjavík
- Hotel Rangá
- Reykjavík Residence Suites
