Samfélagsmiðlar

Sumarbann á lággjaldaflugfélög myndi litlu breyta

Formaður Samtaka ferðaþjónustunnar leggur til að lággjaldaflugfélög sem aðeins fljúga til Íslands á sumrin verði beint frá Keflavíkurflugvelli og til Akureyrar. Hins vegar eru það oftar klassísk flugfélög frekar en lággjaldaflugfélög sem aðeins sinna Íslandsflugi yfir aðalferðamannatímabilið.
Af þeim 24 flugfélögum sem bjóða upp á áætlunarflug frá Keflavíkurflugvelli eru 11 sem eingöngu stunda Íslandsflug fyrir sumarmánuðina. Þar af eru þrjú sem flokka má sem hefðbundin lággjaldaflugfélög en í gær viðraði Grímur Sæmundsen, formaður Samtaka ferðaþjónustunnar, þá hugmynd að lággjaldaflugfélögum sem eingöngu fljúga til Íslands yfir sumarið verði beint til Akureyrar eða Egilsstaða líkt og Mbl.is greindi frá. Það eru hins vegar aðallega hefðbundin félög sem takmarka áætlunarferðir til Íslands við háannatímann og þessi þrjú lággjaldaflugfélög sem það gera eru öll í eigu stærstu flugfélaga Evrópu. Þannig er Eurowings undir stjórn Lufthansa, stærsta flugfélags Þýskalands, sem jafnframt býður aðeins upp á flug til Íslands frá vori og fram á haust. Transavia sem flýgur hingað frá París er hluti af samsteypu KLM og Air France og svo er það spænska lággjaldaflugfélagið Iberia Express sem kemur hingað frá Madríd en það félag er útibú frá Iberia, stærsta flugfélagi Spánar.

Óskýr skil

Að úthýsa Eurowings, Transavia og Iberia Express frá Keflavíkurflugvelli myndi hins vegar hafa lítil áhrif á umferðina um Flugstöð Leifs Eiríkssonar. Í júlí sl. stóðu þessi þrjú félög nefnilega fyrir tæplega þremur af hverjum hundrað flugferðum til og frá landinu samkvæmt talningu Túrista. Reyndar mætti líta á FlyNiki sem lággjaldafélag en þetta austurríska flugfélag tilheyrir Airberlin sem ekki lengur flokkast sem slíkt. Skilin á milli þessara tveggja flokka verða sífellt óskýrari líkt og nýleg umræða um Icelandair sýnir. Þá var mikið rætt hvort félagið myndi feta veg lággjaldaflugfélaganna að einhverju leyti og endaði sú umræða með því að forstjóri Icelandair Group sagði flugfélagið vera „Hybrid“, þ.e. blöndu af lággjaldafélagi og hefðbundnu líkt og framkvæmdastjóri Icelandair sagði um árið.
Það flækir einnig flokkunina að mörg hefðbundin flugfélög hafa fylgt í fótspor lággjaldaflugfélaga og tekið upp tösku- og sætisgjöld á meðan flugfélög eins og WOW air og Ryanair eru nú með viðskiptafargjöld á boðstólum, eitthvað sem áður var bara að finna hjá þeim klassísku. Það gæti því orðið erfitt að réttlæta bann við flugi Eurowings til Keflavíkurflugvallar en heimila áframhaldandi sumarflug systurfélaga þess, Austrian Airlines og Lufthansa.

Gengur illa að fá millilandaflug norður

Það er heldur ekki víst að hægt sé að dreifa flugfélögum um landið frekar en ferðamönnum. Þó auðvitað væri ákjósanlegt að beina þotum Eurowings, Transavia og Iberia Express út á land því gera má ráð fyrir að félögin hafi flutt hingað á bilinu 10 til 13 þúsund ferðamenn í júlí sl. Áhugi erlendra flugfélaga á því að fljúga beint til Akureyrar eða Egilsstaða virðist hins vegar vera takmarkaður. Til að mynda hefur ekkert flugfélag hafið áætlunarflug til Akureyrar síðustu ár jafnvel þó heimamenn hafi unnið að því um langt skeið. Í tíð síðustu ríkisstjórnar var svo settur á stofn flugþróunarsjóður sem hefur til ráðstöfunar einn milljarð króna til að styðja við millilandaflug til og frá Akureyri og Egilsstöðum. Stofnun þess sjóðs hefur heldur engu skilað og nýverið var reglum hans breytt þannig að nú er innanlandsflug frá Keflavíkurflugvelli í tengslum við alþjóðaflug styrkbært. Öfugt við það sem var þegar sjóðurinn var settur á laggirnar. En í síðasta mánuði hóf Flugfélag Íslands beint flug frá Akureyri til Keflavíkurflugvallar og þar með er í fyrsta skipti hægt að fljúga innanlands frá Flugstöð Leifs Eiríkssonar en þó bara ef farþeginn er á leið til eða frá landinu.

 
 

Nýtt efni

Árið 1970 barst Pattie Boyd nafnlaust og dularfullt ástarbréf frá einhverjum sem þráði hana afar heitt. Vandinn var bara sá að Pattie var þegar gift öðrum manni og ekki ófrægum; hún og George Harrison gítarleikari The Beatles höfðu búið saman í sex ár þegar bréfið barst Pattie.  „Ég skrifa þér þessa orðsendingu í þeim megintilgangi …

Næring forfeðra okkar á oftar en ekki fyllilega erindi við nútímamanninn. Sum þeirra matvæla sem nú er hent var hreinlega slegist um áður fyrr. Með vaxandi hraða þjóðfélagsins og breyttri menningu hefur heilsusamlegt hráefni eins og innmatur, dýrafitur, bein og mergur orðið að hliðarafurð sem fer til spillis. Þessi sóun hefur í för með sér …

Gistinætur Breta á norðlenskum hótelum í janúar voru 422 talsins sem er rétt um tíund af því sem var í janúar árin 2018 og 2019 þegar breska ferðaskrifstofan Super Break bauð upp á pakkaferðir til Akureyrar frá nokkrum breskum flugvöllum. Tilkoma áætlunarflugs Easyjet frá London til Akureyrar hefur því ennþá miklu minni áhrif á gistigeirann …

Stærstu hluthafar Play skuldbindu sig til að leggja flugfélaginu til 2,6 milljarða króna í nýtt hlutafé í byrjun síðustu viku en með þeim skilyrðum að hlutafjárútboðið myndi nema samtals fjórum milljörðum króna. Nú hefur félagið tryggt sér þá 1,4 milljarða sem upp á vantaði. Þetta kemur fram í tilkynningu. Þar segir að þessi hlutafjáraukning sé …

Í febrúar léku þýsku fótboltaliðin Hansa Rostock og Hamburger Sport Verein (HSV) á heimavelli Hansa í Rostock. Bæði liðin eru gömul stórveldi á fótboltavellinum en eru nú í nokkrum öldudal og leika í annarri deild þýska fótboltans. Leikurinn endaði 2-2 sem voru auðvitað töluverð vonbrigði fyrir lið Hamborgar því þeir keppast við að komast aftur …

Útgerðir skemmtiferðaskipa virðast bjartsýnar um að fólk sæki mjög í siglingar á árinu. Ferðaþorstanum eftir innilokun Covid 19-áranna hafi ekki enn verið svalað. Þá kjósi margir, sem á annað borð hafa efni á því, verja fleiri ferðadögum á friðsælu floti um heimsins höf fremur en að olnboga sig í gegnum manngrúa borga og vinsælla ferðamannastaða. …

Það voru keyptar 390 þúsund gistinætur á íslenskum gististöðum í janúar eða 13 prósentum færri en í janúar í fyrra. Næturnar núna voru álíka margar og í janúar 2019 en það var í mars það ár sem rekstur Wow Air stöðvaðist. Gisitnóttum útlendinga á skráðum gististöðum, stór hluti heimagistingarinnar fellur þar ekki undir, fækkaði um …

Lilja Dögg Alfreðsdóttir

Vinna við aðgerðaáætlun í tengslum við ferðamálastefnu Íslands til ársins 2030 er langt komin. Birt hafa verið í Samráðsgátt drög að tillögu til þingsályktunar og óskað umsagna. Það kemur síðan í hlut Alþingis að vinna úr tillögum sem orðið hafa til í víðtæku samráði hagaðila í ferðaþjónustu - og ákveða síðan hvert skal stefna. Þær …