„Við hjá Icelandair hótelum erum auðvitað hæstánægð með að eiga tvö hótel á þessum lista. Canopy Reykjavík, sem er í efsta sæti, hefur átt miklum vinsældum að fagna allt frá opnun þess sumarið 2016. Alda hótel bættist síðan við okkar rekstur á nýliðnu ári, en það hefur sömuleiðis notið mikilla vinsælda allt frá því það opnaði vor 2014,“ segir Hildur Ómarsdóttir, markaðs- og þróunarstjóri, Icelandair hótelanna í tilefni af því að Canopy er í efsta sæti á nýjum Íslandslista Tripadvisor yfir bestu hótelin árið 2019. Alda er í fjórða sæti.
Að sögn Hildar vegur staðsetning hótela þungt í einkunnagjöf gesta. „Bæði þessi hótel eruð auðvitað frábærlega vel staðsett í miðbæ Reykjavíkur. Viðmót starfsmanna, þægindi og hönnun herbergja, þrif og auðvitað þær veitingar sem í boði eru skipta sömuleiðis lykilmáli þegar kemur að heildarupplifun gests á hverjum stað fyrir sig og endurgjöf. Við leggjum mjög mikla áherslu á gæðaeftirlit okkar hótela, og ekki síst á þjálfun starfsmanna, en hjá Icelandair hótelum starfar mjög sterkt teymi fagfólks við þjálfun og kennslu bæði starfsmanna og nema. Þjálfunarteymið, hótelstjórar og starfsmenn í framlínu eiga mikinn heiður skilinn.“
Á sama tíma og Hildur gleðst yfir árangri hótela Icelandar þá segir hún það sömuleiðis afar ánægjulegt að sjá góðan árangur samkeppnisaðilanna á lista á Tripadvisor. „Sér í lagi landsbyggðarhótelanna sem eru ofarlega á listanum. Mér finnst þetta staðfesta þann árangur sem er að nást í bættum gæðum hótelreksturs hér á landi, og það að landsbyggðin gefur orðið Reykjavík ekkert eftir í gæðum gistingar.“
Að mati Hildar skiptir lykilmáli að sameinast um að efla markaðssetningu þjónustufyrirtækja á landsbyggðinni allt árið um kring svo að þau nái að standa undir rekstrinum sem er enn þungur víða um land yfir vetrartímann. „Það er miklu nær að árétta alla þá frábæru valmöguleika sem í boði eru um allt land, frekar en að setja allan fókus á Reykjavík eingöngu og hótelin hér sem velflest eru í toppnýtingu. Þannig ættum við að fara að horfa til frekari aðgreiningar í markaðssetningu Reykjavíkur og landsbyggðar, og finna til nýjar áherslur við kynningu á borginni, og vísa frekar náttúru unnendum áfram út fyrir bæjarmörkin.“
Horfurnar í ár eru nokkuð góðar að sögn Hildar. „Við sjáum jafna aukningu nýtingar á öllum okkar hótelum þó svo að bókunarglugginn sé stöðugt að styttast yfir vetrartímann.“
