Arctic Adventures og framtakssjóðurinn Icelandic Tourism Fund I (ITF) hafa gengið frá samkomulagi um sameiningu þess fyrrnefnda og Into the Glacier. Þar með verður til stórfyrirtæki í ferðatengdri afþreyingu í öllum landshlutum samkvæmt því sem segir í tilkynningu. Starfsmenn sameinaðs félags eru um 400 talsins.
„Við erum bjartsýn á framtíð íslenskrar ferðaþjónustu. Með sameiningunni verður til öflugt fyrirtæki með mikla möguleika og við stefnum að því að skrá það á hlutabréfamarkað innan tveggja ára,“ segir Styrmir Þór Bragason, forstjóri Arctic Adventures. Þetta er önnur atlaga þessara fyrirtækja að sameiningu en ekkert varð úr samrunanum sem boðaður var í byrjun árs.
Hluti af samkomulaginu sem nú er gert felur í sér að Arctic Adventures kaupir hluti ITF í fjórum afþreyingarfyrirtækjum í ferðaþjónustu. Þar er um að ræða Óbyggðasetur Íslands í Fljótsdal, Raufarhóli, sem rekur ferðaþjónustu í Raufarhólshelli, Skútusiglingum á Ísafirði, sem starfar undir vörumerkinu Borea Adventures og að lokum fyrirtækið Welcome Entertainmen , sem stendur að leiksýningunni „Icelandic Sagas – The Greatest Hits“ í Hörpu.
Kaupverðið greiðist með hlutum í Arctic Adventures hf., sem þýðir að ITF verður eftir viðskiptin stór hluthafi í sameinuðu félagi. Fyrirtækin verða áfram rekin sjálfstætt en í nánu samstarfi við Arctic Adventures samkvæmt því sem segir í tilkynningu.
Þar er haft eftir Helga Júlíussyni, framkvæmdastjóra ITF, að sameiningin sé fagnaðarefni fyrir íslenska ferðaþjónustu. „Við getum nýtt krafta félaganna enn betur, náum fram umtalsverðri hagræðingu og aukum slagkraftinn til muna þegar kemur að sölu og markaðssetningu. Arctic Adventures hefur mjög sterka stöðu á markaði fyrir afþreyingartengda ferðaþjónustu. Sú staða styrkist enn frekar í kjölfar þessara viðskipta og getur fyrirtækið nú boðið upp á fyrsta flokks afþreyingu í öllum landshlutum.“
Into the Glacier, býður upp á ferðir inn í ísgöngin í Langjökli sem eru stærstu manngerðu ísgöng í heimi. Hátt í 60 þúsund manns hafa heimsótt ísgöngin á árinu. Arctic Adventures hefur lagt áherslu á að gefa ferðafólki kost á ævintýrum og upplifun í íslenskri náttúru. Viðskiptavinir á árinu eru um 250 þúsund. Samanlögð velta fyrirtækjanna tveggja á árinu 2019 er um 7 milljarðar króna.
Eftir viðskiptin getur Arctic Adventures boðið viðskiptavinum sínum enn fjölbreyttari möguleika á afþreyingu hringinn í kringum landið. Styrmir Þór Bragason, forstjóri Arctic Adventures, segir þetta mjög mikilvægt. „Samkeppnisstaðan styrkist og við höfum meira að bjóða á alþjóðlega ferðamarkaðnum. Það skiptir mjög miklu að geta boðið ferðafólki fjölbreytta afþreyingu. Við sjáum enn frekari tækifæri til vaxtar á næstu misserum og stefnum ótrauð að skráningu á hlutabréfamarkað innan tveggja ára.“
Framtakssjóðurinn Icelandic Tourism Fund var stofnaður að frumkvæði Icelandair Group árið 2013 með það að markmiði að fjárfesta í uppbyggingu afþreyingartengdrar ferðaþjónustu á Íslandi. Sérstök áhersla hefur verið lögð á að fjárfesta í starfsemi sem rekin er allt árið og nýtir sem best þá innviði sem til staðar eru í greininni. Þá hefur verið horft til fjárfestinga í verkefnum á landsbyggðinni.
